mast-e-nigah-e-naz ka arman nikaliye

mast-e-nigāh-e-nāz kā armāñ nikāliye

be-ḳhud banā ke bazm se ai jaañ nikāliye

husn-e-nazara-soz kī haiñ lan-tarāniyāñ

armān-e-dīd mūsī-e-imrāñ nikāliye

pinhāñ hai kufr ishq meñ īmān-e-āshiqāñ

zulmat se nūr-e-chashma-e-haivāñ nikāliye

dam bhar meñ dho.e jā.eñge sab dāġh-e-ma.asiyat

yak qatra ashk tajraba-sāmāñ nikāliye

tauhīd meñ hai naqsh-e-do-rañgī hijāb-e-zāt

zauq-e-nazar kā hausla ai jaañ nikāliye

jab jalva-hā-e-vādī-e-aiman nazar meñ hoñ

ḳhātir se vahm-e-rauza-e-rizvāñ nikāliye

dil ko banā ke nuqta-e-parkār-e-āfiyat

pā-e-talab ba-himmat-e-mardāñ nikāliye

zikr-e-ḳhafī azal se hai vird-e-dil-o-zabāñ

shak hai to tan se tār-e-rag-e-jāñ nikāliye

kaunain ain-e-ilm meñ hai jalva-gāh-e-husn

jeb-e-ḳhirad se ainak-e-irfāñ nikāliye

har jaam meñ hai aks-e-ruḳh-e-yār jalva-gar

ai dil sabīl-e-sohbat-e-rindāñ nikāliye

maqbūliyat suḳhan kī hai 'sāhir' jo rañg-e-bazm

rañg-e-ayār-e-tab-e-suḳhan-dāñ nikāliye

mast-e-nigah-e-naz ka arman nikaliye

be-KHud bana ke bazm se ai jaan nikaliye

husn-e-nazara-soz ki hain lan-taraniyan

arman-e-did musi-e-imran nikaliye

pinhan hai kufr ishq mein iman-e-ashiqan

zulmat se nur-e-chashma-e-haiwan nikaliye

dam bhar mein dhoe jaenge sab dagh-e-masiyat

yak qatra ashk tajraba-saman nikaliye

tauhid mein hai naqsh-e-do-rangi hijab-e-zat

zauq-e-nazar ka hausla ai jaan nikaliye

jab jalwa-ha-e-wadi-e-aiman nazar mein hon

KHatir se wahm-e-rauza-e-rizwan nikaliye

dil ko bana ke nuqta-e-parkar-e-afiyat

pa-e-talab ba-himmat-e-mardan nikaliye

zikr-e-KHafi azal se hai wird-e-dil-o-zaban

shak hai to tan se tar-e-rag-e-jaan nikaliye

kaunain ain-e-ilm mein hai jalwa-gah-e-husn

jeb-e-KHirad se ainak-e-irfan nikaliye

har jam mein hai aks-e-ruKH-e-yar jalwa-gar

ai dil sabil-e-sohbat-e-rindan nikaliye

maqbuliyat suKHan ki hai 'sahir' jo rang-e-bazm

rang-e-ayar-e-tab-e-suKHan-dan nikaliye