mast-o-be-KHud tere mai-KHane ka baam-o-dar bane

mast-o-be-ḳhud tere mai-ḳhāne kā bām-o-dar bane

sāqiyā gar terī chashm-e-mast kā sāġhar bane

hirs ke sahrā meñ jo jhoñkā chale sar sar bane

ishq ke dariyā meñ jo qatra gire gauhar bane

but bane ka.aba banā masjid banī mandar bane

ishq kī duniyā meñ kyā kyā dilrubā manzar bane

dars-e-ibrat daur-e-daurāñ meñ hai bazm-e-mai-kada

mai-kashoñ kī ḳhaak se kyā kyā ḳhum-o-sāġhar bane

kyā ajab is ḳhāk-dāñ ke hoñ kabhī chashm-o-charāg

jā ke auj-e-āsmāñ par jo mah-o-aḳhtar bane

be-e-gudāz-e-ishq rañg-e-husn bhī khultā nahīñ

ishq ke sāñche meñ Dhal kar nuur kā paikar bane

dil ke vīrāne meñ kyā kyā hasrateñ ābād haiñ

raah meñ sail-e-fanā kī kaise kaise ghar bane

ai shah-e-kaunain dar par ġhair ke jhuktā nahīñ

tere sañg-e-āstāñ ke vāste jo sar bane

phir bahār aa.ī chaman meñ phir uThā josh-e-junūñ

phir sar-e-shorīda kī ḳhātir na.e patthar bane

fasl-e-gul hai bāġhbāñ ab ruḳhsat-e-parvāz hai

ab to tinke āshiyāñ ke mere bāl-o-par bane

banda-e-'nāzir' bhī hāzir tere mai-ḳhvāroñ meñ ho

ai shah-e-laulāk jab tū sāqī-e-kausar bane

mast-o-be-KHud tere mai-KHane ka baam-o-dar bane

saqiya gar teri chashm-e-mast ka saghar bane

hirs ke sahra mein jo jhonka chale sar sar bane

ishq ke dariya mein jo qatra gire gauhar bane

but bane kaba bana masjid bani mandar bane

ishq ki duniya mein kya kya dilruba manzar bane

dars-e-ibrat daur-e-dauran mein hai bazm-e-mai-kada

mai-kashon ki KHak se kya kya KHum-o-saghar bane

kya ajab is KHak-dan ke hon kabhi chashm-o-charag

ja ke auj-e-asman par jo mah-o-aKHtar bane

be-e-gudaz-e-ishq rang-e-husn bhi khulta nahin

ishq ke sanche mein Dhal kar nur ka paikar bane

dil ke virane mein kya kya hasraten aabaad hain

rah mein sail-e-fana ki kaise kaise ghar bane

ai shah-e-kaunain dar par ghair ke jhukta nahin

tere sang-e-astan ke waste jo sar bane

phir bahaar aai chaman mein phir uTha josh-e-junun

phir sar-e-shorida ki KHatir nae patthar bane

fasl-e-gul hai baghban ab ruKHsat-e-parwaz hai

ab to tinke aashiyan ke mere baal-o-par bane

banda-e-'nazir' bhi hazir tere mai-KHwaron mein ho

ai shah-e-laulak jab tu saqi-e-kausar bane