mat boliyo tu us se jahandar dekhna

mat boliyo tū us se 'jahāñdār' dekhnā

khīñche hue hai aaj vo talvār dekhnā

abrū-kamāñ se tīr-e-nigah maar dekhnā

lagtī hai paar dil ke mire yaar dekhnā

giryāñ huuñ ek umr se pūchhā na yaar ne

rotā hai kaun ye pas-e-dīvār dekhnā

ta.alīm ashk-o-āh se lī mere abr ne

jo yuuñ baras rahā hai dhuāñ-dhār dekhnā

sar-rishta kufr-o-dīñ kā haqīqat meñ ek hai

jo tār-e-sub.ha hai so hai zunnār dekhnā

yaaro maiñ kah rahā thā ki dil mat de de ke dil

aayā hai tañg kyā hī 'jahāñdār' dekhnā

mat boliyo tu us se 'jahandar' dekhna

khinche hue hai aaj wo talwar dekhna

abru-kaman se tir-e-nigah mar dekhna

lagti hai par dil ke mere yar dekhna

giryan hun ek umr se puchha na yar ne

rota hai kaun ye pas-e-diwar dekhna

talim ashk-o-ah se li mere abr ne

jo yun baras raha hai dhuan-dhaar dekhna

sar-rishta kufr-o-din ka haqiqat mein ek hai

jo tar-e-subha hai so hai zunnar dekhna

yaro main kah raha tha ki dil mat de de ke dil

aaya hai tang kya hi 'jahandar' dekhna