mat puchh ki is paikar-e-KHush-rang mein kya hai

mat pūchh ki is paikar-e-ḳhush-rañg meñ kyā hai

ik ret kā Tiila pas-e-dīvār-e-qabā hai

ye ḳhalq ibārat hai lab-e-goyā kī muhtāj

dekheñ to faqat daaġh hai boleñ to sadā hai

aatī hai sisakne kī dil-e-dasht se āvāz

shāyad ki rag-o-pai meñ koī ābla-pā hai

hai bojh tan-e-ḳhasta kā dīvār-e-nafas par

goyā ki mire ghar kā sutūñ mauj-e-havā hai

kuchh vahshat-e-iz.hār lahū shāḳh pe laa.ī

kuchh raas gul-e-zaḳhm ko ye āb-o-havā hai

ab aur koī nutq-o-zabāñ hoñ to kahūñ kuchh

is ḳhāna-e-dar-band meñ kyā hashr bapā hai

ab ijz-e-safar kī bhī malāmat hai mire sar

har raah mire sāmne āġhosh-kushā hai

phir tīrgī-e-shab meñ nazar aa.ī na.ī shakl

ab dekh ki kis ḳhvāb kā dar aañkh pe vā hai

Takrā ke siyāhī se palaT jaatī hai sūrat

'shāhid' dil-e-ā.īna meñ dīvār sī kyā hai

mat puchh ki is paikar-e-KHush-rang mein kya hai

ek ret ka Tila pas-e-diwar-e-qaba hai

ye KHalq ibarat hai lab-e-goya ki muhtaj

dekhen to faqat dagh hai bolen to sada hai

aati hai sisakne ki dil-e-dasht se aawaz

shayad ki rag-o-pai mein koi aabla-pa hai

hai bojh tan-e-KHasta ka diwar-e-nafas par

goya ki mere ghar ka sutun mauj-e-hawa hai

kuchh wahshat-e-izhaar lahu shaKH pe lai

kuchh ras gul-e-zaKHm ko ye aab-o-hawa hai

ab aur koi nutq-o-zaban hon to kahun kuchh

is KHana-e-dar-band mein kya hashr bapa hai

ab ijz-e-safar ki bhi malamat hai mere sar

har rah mere samne aaghosh-kusha hai

phir tirgi-e-shab mein nazar aai nai shakl

ab dekh ki kis KHwab ka dar aankh pe wa hai

Takra ke siyahi se palaT jati hai surat

'shahid' dil-e-aina mein diwar si kya hai