mat use hath lagana wo sajan aag hai aag

mat use haath lagānā vo sajan aag hai aag

tum use ḳhaak samajhte ho badan aag hai aag

us kī hasrat meñ bhale log mare jaate haiñ

kaun samjhā.e ki vo ġhuncha-dahan aag hai aag

apnī tahzīb ko paanī kī zarūrat hogī

chuum aayā huuñ lab-e-gañg-o-jaman aag hai aag

vo jo momin hai to miTTī hī kafan hai us kā

aur kāfir hai to phir us kā kafan aag hai aag

saare sayyāre sitāre bhī haiñ ātish-pāre

ye zamīñ aag kī hai nīl-gagan aag hai aag

phuul khilte haiñ ki bārūd ḳhabar bhī denā

kitnā shādāb hai aur kitnā chaman aag hai aag

sard alfāz ko baḳhshī hai harārat kis ne

rashk-e-'ḳhurshīd' hai vo us kā suḳhan aag hai aag

mat use hath lagana wo sajan aag hai aag

tum use KHak samajhte ho badan aag hai aag

us ki hasrat mein bhale log mare jate hain

kaun samjhae ki wo ghuncha-dahan aag hai aag

apni tahzib ko pani ki zarurat hogi

chum aaya hun lab-e-gang-o-jaman aag hai aag

wo jo momin hai to miTTi hi kafan hai us ka

aur kafir hai to phir us ka kafan aag hai aag

sare sayyare sitare bhi hain aatish-pare

ye zamin aag ki hai nil-gagan aag hai aag

phul khilte hain ki barud KHabar bhi dena

kitna shadab hai aur kitna chaman aag hai aag

sard alfaz ko baKHshi hai hararat kis ne

rashk-e-'KHurshid' hai wo us ka suKHan aag hai aag