mata-e-dil hai ghane andheron mein kho na jae

matā-e-dil hai ghane añdheroñ meñ kho na jaa.e

ḳhayāl rakhnā ki raat jangal meñ ho na jaa.e

dayār-e-dil kal talak to sab par khulā huā thā

par ab ye tai hai ki bas vo aa.egā jo na jaa.e

barastī bārish ne jaane kyā jī meñ Thaan lī hai

lagā hai dhaḌkā ki ḳhvāb āñkhoñ se dho na jaa.e

qadam baḌhātā hai aaj dil phir usī kī jānib

hisār-e-ġham meñ ye phir giraftār ho na jaa.e

mire ḳhudāyā kabhī to dil kī anā bhī jaage

bichhaḌne vaale agar bulā.eñ bhī to na jaa.e

bahut kaThin hai tirī sadāoñ se bach ke chalnā

muḌe to Dar hai ki jism patthar kā ho na jaa.e

abhī to aadhā safar hai aur shaam ho rahī hai

mire pahuñchne se qabl 'sīmā' vo so na jaa.e

mata-e-dil hai ghane andheron mein kho na jae

KHayal rakhna ki raat jangal mein ho na jae

dayar-e-dil kal talak to sab par khula hua tha

par ab ye tai hai ki bas wo aaega jo na jae

barasti barish ne jaane kya ji mein Than li hai

laga hai dhaDka ki KHwab aankhon se dho na jae

qadam baDhata hai aaj dil phir usi ki jaanib

hisar-e-gham mein ye phir giraftar ho na jae

mere KHudaya kabhi to dil ki ana bhi jage

bichhaDne wale agar bulaen bhi to na jae

bahut kaThin hai teri sadaon se bach ke chalna

muDe to Dar hai ki jism patthar ka ho na jae

abhi to aadha safar hai aur sham ho rahi hai

mere pahunchne se qabl 'sima' wo so na jae