mata-e-fikr nashat-e-amal farogh-e-hayat

matā-e-fikr nashāt-e-amal faroġh-e-hayāt

tumhārā dard tumhārī ye āḳhirī sauġhāt

harīf saarā zamāna raqīb saarā jahāñ

churā na le koī Dartā huuñ is kā rang-e-sabāt

kahāñ chhupā.ūñ use kis tarah bachā.ūñ use

charāġh ek havā tez aur añdherī raat

farāġh jism kā dil kā sukūñ nazar kā qarār

tumhāre dard ke dushman haiñ ye sabhī hālāt

maiñ us maqām pe pahuñchā huuñ in dinoñ ki jahāñ

na kāhish-e-ġham-e-daurāñ na kāvish-e-ġham-e-zāt

bas ik ḳhalish ke sivā ek aarzū ke sivā

ajiib shahr-e-ḳhamoshāñ hai shahr-e-ehsāsāt

tumhī batāo ki aise meñ ik tumhāre sivā

kahūñ to kis se kahūñ ab tumhāre dard kī baat

mata-e-fikr nashat-e-amal farogh-e-hayat

tumhaara dard tumhaari ye aaKHiri saughat

harif sara zamana raqib sara jahan

chura na le koi Darta hun is ka rang-e-sabaat

kahan chhupaun use kis tarah bachaun use

charagh ek hawa tez aur andheri raat

faragh jism ka dil ka sukun nazar ka qarar

tumhaare dard ke dushman hain ye sabhi haalat

main us maqam pe pahuncha hun in dinon ki jahan

na kahish-e-gham-e-dauran na kawish-e-gham-e-zat

bas ek KHalish ke siwa ek aarzu ke siwa

ajib shahr-e-KHamoshan hai shahr-e-ehsasat

tumhi batao ki aise mein ek tumhaare siwa

kahun to kis se kahun ab tumhaare dard ki baat