mataa-e-husn-o-jamal-o-kamal kya kya kuchh

matā.a-e-husn-o-jamāl-o-kamāl kyā kyā kuchh

churā ke le ga.e ye māh-o-sāl kyā kyā kuchh

tū muñh se bole na bole sunā rahe haiñ hameñ

fasāne shab ke tire ḳhad-o-ḳhāl kyā kyā kuchh

mire ḳhudā ne hai baḳhshā mujhe virāsat meñ

mizāh-o-tanz-o-jamāl-o-jalāl kyā kyā kuchh

maiñ bach gayā tirī rahmat se varna marqad meñ

farishte karte na jaane savāl kyā kyā kuchh

sivā.e usva-e-shabbīr kuchh na kaam aayā

dhamāl raqs ye vajd aur haal kyā kyā kuchh

karam hai un kā na rījhā maiñ phir bhī duniyā par

thā is meñ mansab-o-māl-o-manāl kyā kyā kuchh

hañsī ke parde meñ 'salmān' ne chhupā liye haiñ

musībat-o-ġham-o-huzn-o-malāl kyā kyā kuchh

mataa-e-husn-o-jamal-o-kamal kya kya kuchh

chura ke le gae ye mah-o-sal kya kya kuchh

tu munh se bole na bole suna rahe hain hamein

fasane shab ke tere KHad-o-KHal kya kya kuchh

mere KHuda ne hai baKHsha mujhe wirasat mein

mizah-o-tanz-o-jamal-o-jalal kya kya kuchh

main bach gaya teri rahmat se warna marqad mein

farishte karte na jaane sawal kya kya kuchh

siwae uswa-e-shabbir kuchh na kaam aaya

dhamal raqs ye wajd aur haal kya kya kuchh

karam hai un ka na rijha main phir bhi duniya par

tha is mein mansab-o-mal-o-manal kya kya kuchh

hansi ke parde mein 'salman' ne chhupa liye hain

musibat-o-gham-o-huzn-o-malal kya kya kuchh