mauj-e-dariya ko piyen kya gham-e-KHamyaza karen

mauj-e-dariyā ko piyeñ kyā ġham-e-ḳhamyāza kareñ

rag-e-afshurda-e-sahrā meñ lahū taaza kareñ

dil ke mahbas meñ kareñ zaat kā mātam kab tak

aao bāhar to chaleñ vaqt kā andāza kareñ

ḳhuuñ hai ik daulat-e-dil luuT hī leñ ahl-e-falak

chehra-e-dāġh-e-qamar par to nayā ġhāza kareñ

uñgliyāñ sard haiñ phūñkeñ to unheñ hosh meñ laa.eñ

apne sīnoñ pe likheñ harf-e-vafā taaza kareñ

shīsha thā ik ġham-e-dil TuuT ke sāhil pe girā

muntashir ret ke har zarre kā shīrāza kareñ

gurg-e-ehsās se bachne kī to koī nahīñ raah

sag-e-taḳh.īl pe band aañkh kā darvāza kareñ

mauj-e-dariya ko piyen kya gham-e-KHamyaza karen

rag-e-afshurda-e-sahra mein lahu taza karen

dil ke mahbas mein karen zat ka matam kab tak

aao bahar to chalen waqt ka andaza karen

KHun hai ek daulat-e-dil luT hi len ahl-e-falak

chehra-e-dagh-e-qamar par to naya ghaza karen

ungliyan sard hain phunken to unhen hosh mein laen

apne sinon pe likhen harf-e-wafa taza karen

shisha tha ek gham-e-dil TuT ke sahil pe gira

muntashir ret ke har zarre ka shiraaza karen

gurg-e-ehsas se bachne ki to koi nahin rah

sag-e-taKHil pe band aankh ka darwaza karen