mauj-e-sarsar ki tarah dil se guzar jaoge

mauj-e-sarsar kī tarah dil se guzar jāoge

kis ko mā'lūm thā tum dil meñ utar jāoge

chār-sū vaqt kī gardish kī fasīl-e-shab hai

bach ke is gardish-e-daurāñ se kidhar jāoge

ā.īna-ḳhāne se dāman ko bachā kar guzro

ā.īna TuuTā to rezoñ meñ bikhar jāoge

ik zarā aur qarīb-e-rag-e-jāñ aao to

mere ḳhūñ-nāb meñ tum Dhal ke sañvar jāoge

dekho vo chāñd sisaktā hai ufuq kī had par

tum bhī is chāñd kī mānind guzar jāoge

is bharī bazm se hañs-bol ke ruḳhsat ho lo

kal jo uTThoge to bā-dīda-e-tar jāoge

mauj-e-sarsar ki tarah dil se guzar jaoge

kis ko ma'lum tha tum dil mein utar jaoge

chaar-su waqt ki gardish ki fasil-e-shab hai

bach ke is gardish-e-dauran se kidhar jaoge

aaina-KHane se daman ko bacha kar guzro

aaina TuTa to rezon mein bikhar jaoge

ek zara aur qarib-e-rag-e-jaan aao to

mere KHun-nab mein tum Dhal ke sanwar jaoge

dekho wo chand sisakta hai ufuq ki had par

tum bhi is chand ki manind guzar jaoge

is bhari bazm se hans-bol ke ruKHsat ho lo

kal jo uTThoge to ba-dida-e-tar jaoge