mauj ubhri aa gai sahil ke hath

mauj ubhrī aa ga.ī sāhil ke haath

maiñ chalā aur jā lagā manzil ke haath

ik taḌap jo aa ga.ī bismil ke haath

kyoñ na chūme baḌh ke vo bismil ke haath

dar-haqīqat maut kā paiġhām hai

nā-ḳhudā.ī aur nā-qābil ke haath

haath chhoTe paḌ ga.e insāf ke

itne lambe the mire qātil ke haath

ghoñT diije qābiliyyat kā galā

kījiye mazbūt nā-qābil ke haath

naqsh maiñ ne kar diye naqsh-e-qadam

ek daulat aa ga.ī manzil ke haath

is tarah phaile rahe fitna fasād

jis tarah phaile raheñ saa.il ke haath

kyā batā.ūñ kaisī durgat ban ga.ī

dil kī mere haath merī dil ke haath

'sāz' āsānī mire haath aa ga.ī

aa gayā jis vaqt meñ mushkil ke haath

mauj ubhri aa gai sahil ke hath

main chala aur ja laga manzil ke hath

ek taDap jo aa gai bismil ke hath

kyon na chume baDh ke wo bismil ke hath

dar-haqiqat maut ka paigham hai

na-KHudai aur na-qabil ke hath

hath chhoTe paD gae insaf ke

itne lambe the mere qatil ke hath

ghonT dije qabiliyyat ka gala

kijiye mazbut na-qabil ke hath

naqsh main ne kar diye naqsh-e-qadam

ek daulat aa gai manzil ke hath

is tarah phaile rahe fitna fasad

jis tarah phaile rahen sail ke hath

kya bataun kaisi durgat ban gai

dil ki mere hath meri dil ke hath

'saz' aasani mere hath aa gai

aa gaya jis waqt mein mushkil ke hath