maujon mein maza aata ho jise girdab se larzan kya hoga

maujoñ meñ maza aatā ho jise girdāb se larzāñ kyā hogā

jo banda-e-sāhil ban ke rahe lazzat-kash-e-tūfāñ kyā hogā

jo umr kaTe be-kaifī meñ be-lutfī meñ be-rangī meñ

us qisse kī surḳhī kyā hogī us ziist kā unvāñ kyā hogā

rūdād-e-qafas kyā ḳhaak kaheñ jab tak bhī rahe ye fikr rahī

anjām-e-nasheman kyā hogā anjām-e-gulistāñ kyā hogā

hai apnā junūn-e-ishq-fazā har qaid-e-makāñ se bālā-tar

mamnūn-e-gulistāñ kyā hogā pāband-e-bayābāñ kyā hogā

begāna-e-bīm-o-rajā ho kar taqdīr banā.eñ aap apnī

ye fikr dalīl-e-pastī hai anjām-e-gulistāñ kyā hogā

vaañ zid hai ki be-māñge na mile yaañ husn-e-talab bhī hai bid.at

rahmat ke liye bhī sharteñ hoñ to afv kā armāñ kyā hogā

ye tarz-e-jahāñ ye ḳhūn-e-vafā ye ham-nafasoñ kī be-mehrī

takmīl-e-tamannā ho na sakī to ziist kā sāmāñ kyā hogā

rangīn javānī hī kab thī ḳhair ab to buḌhāpā aaya hai

chālīs ke peThe meñ āḳhir ab 'badr' ġhazal-ḳhvāñ kyā hogā

maujon mein maza aata ho jise girdab se larzan kya hoga

jo banda-e-sahil ban ke rahe lazzat-kash-e-tufan kya hoga

jo umr kaTe be-kaifi mein be-lutfi mein be-rangi mein

us qisse ki surKHi kya hogi us zist ka unwan kya hoga

rudad-e-qafas kya KHak kahen jab tak bhi rahe ye fikr rahi

anjam-e-nasheman kya hoga anjam-e-gulistan kya hoga

hai apna junun-e-ishq-faza har qaid-e-makan se baala-tar

mamnun-e-gulistan kya hoga paband-e-bayaban kya hoga

begana-e-bim-o-raja ho kar taqdir banaen aap apni

ye fikr dalil-e-pasti hai anjam-e-gulistan kya hoga

wan zid hai ki be-mange na mile yan husn-e-talab bhi hai bidat

rahmat ke liye bhi sharten hon to afw ka arman kya hoga

ye tarz-e-jahan ye KHun-e-wafa ye ham-nafason ki be-mehri

takmil-e-tamanna ho na saki to zist ka saman kya hoga

rangin jawani hi kab thi KHair ab to buDhapa aaya hai

chaalis ke peThe mein aaKHir ab 'badr' ghazal-KHwan kya hoga