maujud hain kitne hi tujhse bhi hasin kar ke

maujūd haiñ kitne hī tujh se bhī hasīñ kar ke

jhuTlā diyā āñkhoñ ko maiñ dil pe yaqīñ kar ke

jis chashm se rindoñ meñ hū-haq hai usī ne to

zāhid ko bhī rakkhā hai mehrāb-nashīñ kar ke

kyā us kī latāfat kā ahvāl bayāñ kījiye

jo dil pe huā zāhir āñkhoñ ko nahīñ kar ke

kuchh kam thā balā-e-jāñ pe chehra ki uupar se

āñkheñ bhī banā laa.e ġhārat-gar-e-dīñ kar ke

ā.īne ke aage se ab uTh bhī chuko sāhab

kyā kījiyegā ḳhud ko itnā bhī hasīñ kar ke

sau daaġh haiñ siine meñ vo dāġh-e-judā.ī bhī

dekho to zarā hogā un meñ hī kahīñ kar ke

is dil kā to naqsha hī duniyā ne badal Daalā

kuchh yaad hai rahtā thā vo bhī to yahīñ kar ke

'jāved' vahāñ tak to mushkil hai koī pahuñche

mañgvā.iye qāsid bhī jibrīl-e-amīñ kar ke

maujud hain kitne hi tujh se bhi hasin kar ke

jhuTla diya aankhon ko main dil pe yaqin kar ke

jis chashm se rindon mein hu-haq hai usi ne to

zahid ko bhi rakkha hai mehrab-nashin kar ke

kya us ki latafat ka ahwal bayan kijiye

jo dil pe hua zahir aankhon ko nahin kar ke

kuchh kam tha bala-e-jaan pe chehra ki upar se

aankhen bhi bana lae ghaarat-gar-e-din kar ke

aaine ke aage se ab uTh bhi chuko sahab

kya kijiyega KHud ko itna bhi hasin kar ke

sau dagh hain sine mein wo dagh-e-judai bhi

dekho to zara hoga un mein hi kahin kar ke

is dil ka to naqsha hi duniya ne badal Dala

kuchh yaad hai rahta tha wo bhi to yahin kar ke

'jawed' wahan tak to mushkil hai koi pahunche

mangwaiye qasid bhi jibril-e-amin kar ke