mausam achchha hai rut suhani hai

mausam achchhā hai rut suhānī hai

mere lab par tirī kahānī hai

dukh ho yā sukh ho jhelnā hai use

zindagānī to zindagānī hai

aaj bādal haiñ bād-o-bārāñ hai

haath meñ jām-e-arġhavānī hai

jis ne sarshār umr bhar rakkhā

zāhido vo merī javānī hai

log kahte haiñ zindagī jis ko

ek qissa hai ik kahānī hai

zindagī ek said hai jis kī

taak meñ marg-e-nā-gahānī hai

sher kyā zindagī kā naġhma haiñ

maiñ huuñ aur merī gul-fishānī hai

dil kī haiñ vārdāt sher mire

marsiya hai ki nauha-ḳhvānī hai

husn se umr bhar kā yārāna

husn to merā yār-e-jānī hai

maiñ samajhtā huuñ zindagī hai amar

log kahte haiñ ziist faanī hai

'faiz' ab to sañbhal nahīñ paate

nā-tavānī sī nā-tavānī hai

mausam achchha hai rut suhani hai

mere lab par teri kahani hai

dukh ho ya sukh ho jhelna hai use

zindagani to zindagani hai

aaj baadal hain baad-o-baran hai

hath mein jam-e-arghawani hai

jis ne sarshaar umr bhar rakkha

zahido wo meri jawani hai

log kahte hain zindagi jis ko

ek qissa hai ek kahani hai

zindagi ek said hai jis ki

tak mein marg-e-na-gahani hai

sher kya zindagi ka naghma hain

main hun aur meri gul-fishani hai

dil ki hain wardat sher mere

marsiya hai ki nauha-KHwani hai

husn se umr bhar ka yarana

husn to mera yar-e-jaani hai

main samajhta hun zindagi hai amar

log kahte hain zist fani hai

'faiz' ab to sanbhal nahin pate

na-tawani si na-tawani hai