mausam-e-gul aa gaya phir dasht-paimai rahe

mausam-e-gul aa gayā phir dasht-paimā.ī rahe

ai junūñ lāzim hai shaġhl-e-ābla-pā.ī rahe

laakh mizrāb-e-alam kī kār-farmā.ī rahe

ai rabāb-e-isq phir bhī naġhma-pairā.ī rahe

dekhnā hai soz-o-sāz-e-mausam-e-gul kī bahār

imtizāj-e-sho.ala-o-shabnam kī ra.anā.ī rahe

aa sakā lab tak kisī ke bhī na harf-e-mudda.ā

ham tamannā.ī rahe vo bhī tamannā.ī rahe

ham bhī dikhlā.eñ jahāñ ko dil ke dāġhoñ kī bahār

aap kī hāsil agar ham ko masīhā.ī rahe

justujū-e-yār meñ paayā na koī dam qarār

nik.hat-e-gul kī tarah aalam meñ harjā.ī rahe

raunaq-e-dair-o-haram kā 'qādrī' kyā pūchhnā

raushnī ik sham.a kī do ghar meñ jab chhā.ī rahe

mausam-e-gul aa gaya phir dasht-paimai rahe

ai junun lazim hai shaghl-e-abla-pai rahe

lakh mizrab-e-alam ki kar-farmai rahe

ai rabab-e-isq phir bhi naghma-pairai rahe

dekhna hai soz-o-saz-e-mausam-e-gul ki bahaar

imtizaj-e-shoala-o-shabnam ki ranai rahe

aa saka lab tak kisi ke bhi na harf-e-muddaa

hum tamannai rahe wo bhi tamannai rahe

hum bhi dikhlaen jahan ko dil ke daghon ki bahaar

aap ki hasil agar hum ko masihai rahe

justuju-e-yar mein paya na koi dam qarar

nikhat-e-gul ki tarah aalam mein harjai rahe

raunaq-e-dair-o-haram ka 'qadri' kya puchhna

raushni ek shama ki do ghar mein jab chhai rahe