mausam-e-gul mein jo ghir ghir ke ghaTaen aain

mausam-e-gul meñ jo ghir ghir ke ghaTā.eñ aa.iiñ

hosh uḌ jaate haiñ jin se vo havā.eñ aa.iiñ

chal base sū-e-adam tum ne bulāyā jin ko

yaad aa.ī to ġharīboñ kī qazā.eñ aa.iiñ

ruuh taazī huī turbat meñ vo ThanDī ThanDī

bāġh-e-firdaus kī har sū se havā.eñ aa.iiñ

maiñ vo dīvāna thā jis ke liye bazm-e-ġham meñ

jā-ba-jā bichhne ko pariyoñ kī ridā.eñ aa.iiñ

munkir-e-zulm jo jallād hue mahshar meñ

ḳhud gavāhī ke liye sab kī jafā.eñ aa.iiñ

mujrmoñ hī ko nahīñ zulm kā farmān aayā

be-gunāhoñ ko bhī likh likh ke sazā.eñ aa.iiñ

us kā dīvāna huuñ samjhātī haiñ pariyāñ mujh ko

sar phirāne ko kahāñ se ye balā.eñ aa.iiñ

tire bande hue kī jin se lagāvaT tū ne

ai parī-rū tujhe kyūñkar ye adā.eñ aa.iiñ

hashr mauqūf kiyā josh meñ rahmat aa.ī

zaar naale kī jo har sū se sadā.eñ aa.iiñ

lashkar-e-gul jo gulistāñ meñ ḳhizāñ par umDā

saath dene ko pahāḌoñ se ghaTā.eñ aa.iiñ

merī turbat pe kabhī dhuup na aane paa.e

shaam tak sub.h se ghir ghir ke ghaTā.eñ aa.iiñ

muñh chhupāne lage ma.ashūq javāñ ho ho kar

nek-o-bad kī samajh aa.ī to hayā.eñ aa.iiñ

ḳhaak uḌāne jo sabā aa.ī mirī turbat par

sar paTaktī huī rone ko ghaTā.eñ aa.iiñ

baḳhsh dī us ne mire ba.ad jo poshāk mirī

qais o farhād ke hissoñ meñ qabā.eñ aa.iiñ

rāhateñ samjhe hasīnoñ ne jo īzā.eñ diiñ

pyaar aayā to pasand un kī jafā.eñ aa.iiñ

aa gayā rahm use diiñ sab kī murādeñ us ne

ājizoñ kī jo sifārish ko duā.eñ aa.iiñ

mere sahrā kī ziyārat ko hazāroñ pariyāñ

roz le le ke sulaimān ko razā.eñ aa.iiñ

ai 'sharaf' husn-parastoñ ko bulā ke luuTā

in hasīnoñ ke diloñ meñ jo daġhā.eñ aa.iiñ

mausam-e-gul mein jo ghir ghir ke ghaTaen aain

hosh uD jate hain jin se wo hawaen aain

chal base su-e-adam tum ne bulaya jin ko

yaad aai to gharibon ki qazaen aain

ruh tazi hui turbat mein wo ThanDi ThanDi

bagh-e-firdaus ki har su se hawaen aain

main wo diwana tha jis ke liye bazm-e-gham mein

ja-ba-ja bichhne ko pariyon ki ridaen aain

munkir-e-zulm jo jallad hue mahshar mein

KHud gawahi ke liye sab ki jafaen aain

mujrmon hi ko nahin zulm ka farman aaya

be-gunahon ko bhi likh likh ke sazaen aain

us ka diwana hun samjhati hain pariyan mujh ko

sar phirane ko kahan se ye balaen aain

tere bande hue ki jin se lagawaT tu ne

ai pari-ru tujhe kyunkar ye adaen aain

hashr mauquf kiya josh mein rahmat aai

zar nale ki jo har su se sadaen aain

lashkar-e-gul jo gulistan mein KHizan par umDa

sath dene ko pahaDon se ghaTaen aain

meri turbat pe kabhi dhup na aane pae

sham tak subh se ghir ghir ke ghaTaen aain

munh chhupane lage mashuq jawan ho ho kar

nek-o-bad ki samajh aai to hayaen aain

KHak uDane jo saba aai meri turbat par

sar paTakti hui rone ko ghaTaen aain

baKHsh di us ne mere baad jo poshak meri

qais o farhad ke hisson mein qabaen aain

rahaten samjhe hasinon ne jo izaen din

pyar aaya to pasand un ki jafaen aain

aa gaya rahm use din sab ki muraden us ne

aajizon ki jo sifarish ko duaen aain

mere sahra ki ziyarat ko hazaron pariyan

roz le le ke sulaiman ko razaen aain

ai 'sharaf' husn-paraston ko bula ke luTa

in hasinon ke dilon mein jo daghaen aain