mausam-e-gul na bahaaron ka suKHan yaad aae

mausam-e-gul na bahāroñ kā suḳhan yaad aa.e

mujh ko ai maah tire ruḳh kī phaban yaad aa.e

sair-e-gulshan ke liye vo na kahīñ nikle hoñ

kis liye aaj mujhe sarv-o-saman yaad aa.e

jab shafaq dekhūñ to yaad aate haiñ aariz us ke

chāñd ko dekhte hī us kā badan yaad aa.e

bujh gayā dil bhī mire ghar ke charāġhoñ kī tarah

ḳhaak aise meñ koī ġhuncha-dahan yaad aa.e

zindagī aa.e jo phūloñ kā tabassum dekhūñ

ḳhaak uḌtī huī dekhūñ to kafan yaad aa.e

phir tirā lauT ke jaane kā samāñ yaad aayā

phir mujhe silsila-e-ranj-o-mehan yaad aa.e

jab koī rauzan-e-dīvār nazar se guzre

mujh ko zindān-e-tamannā kī kiran yaad aa.e

tū mire saath hai rakhtī hai mirā itnā ḳhayāl

ai ġharīb-ul-vatanī kaise vatan yaad aa.e

jin se vābasta mirā dast-e-ta.alluq thā 'mujīb'

dasht meñ bharte kuleleñ vo hiran yaad aa.e

mausam-e-gul na bahaaron ka suKHan yaad aae

mujh ko ai mah tere ruKH ki phaban yaad aae

sair-e-gulshan ke liye wo na kahin nikle hon

kis liye aaj mujhe sarw-o-saman yaad aae

jab shafaq dekhun to yaad aate hain aariz us ke

chand ko dekhte hi us ka badan yaad aae

bujh gaya dil bhi mere ghar ke charaghon ki tarah

KHak aise mein koi ghuncha-dahan yaad aae

zindagi aae jo phulon ka tabassum dekhun

KHak uDti hui dekhun to kafan yaad aae

phir tera lauT ke jaane ka saman yaad aaya

phir mujhe silsila-e-ranj-o-mehan yaad aae

jab koi rauzan-e-diwar nazar se guzre

mujh ko zindan-e-tamanna ki kiran yaad aae

tu mere sath hai rakhti hai mera itna KHayal

ai gharib-ul-watani kaise watan yaad aae

jin se wabasta mera dast-e-talluq tha 'mujib'

dasht mein bharte kulelen wo hiran yaad aae