mausam-e-hijr to daim hai na ruKHsat hoga

mausam-e-hijr to daa.im hai na ruḳhsat hogā

ek hī lamhe ko ho vasl ġhanīmat hogā

merā dil āḳhirī taare kī tarah hai goyā

Dūbnā us kā na.e din kī bashārat hogā

ab ke hañgāma na.ī tarah huā hai āġhāz

shahr bhī ab ke na.e taur se ġhārat hogā

shāḳh se TuuT ke patte ne ye dil meñ sochā

kaun is tarah bhalā mā.il-e-hijrat hogā

dil se duniyā kā jo rishta hai ajab rishta hai

ham jo TuuTe haiñ to kab shahr salāmat hogā

bādbānoñ se havā lag ke gale rotī hai

ye safīna bhī kisī mauj kī qismat hogā

mausam-e-hijr to daim hai na ruKHsat hoga

ek hi lamhe ko ho wasl ghanimat hoga

mera dil aaKHiri tare ki tarah hai goya

Dubna us ka nae din ki bashaarat hoga

ab ke hangama nai tarah hua hai aaghaz

shahr bhi ab ke nae taur se ghaarat hoga

shaKH se TuT ke patte ne ye dil mein socha

kaun is tarah bhala mail-e-hijrat hoga

dil se duniya ka jo rishta hai ajab rishta hai

hum jo TuTe hain to kab shahr salamat hoga

baadbanon se hawa lag ke gale roti hai

ye safina bhi kisi mauj ki qismat hoga