mausam-e-waqt badalna hai badal jaega

mausam-e-vaqt badalnā hai badal jā.egā

azhdahā raat kā sūraj ko nigal jā.egā

shīsha-e-dil kī safā.ī pe tavajjoh diije

mausam-e-vaqt bahar-hāl badal jā.egā

bas vahī dosto is daur kā muusā hogā

raah paanī meñ banā kar jo nikal jā.egā

saath jo maañ kī du'ā.eñ haiñ to inshā-allāh

hādisa raah meñ aa.egā to Tal jā.egā

kyā ḳhabar thī ki zarā chain ke din aate hī

mere hamsā.e kā lahja hī badal jā.egā

log aa jā.eñge miTTī ke havāle kar ke

tere hamrāh faqat terā 'amal jā.egā

aañch īsār ke sho'loñ kī dikhāo 'ālam'

saḳht patthar bhī jo hogā to pighal jā.egā

mausam-e-waqt badalna hai badal jaega

azhdaha raat ka suraj ko nigal jaega

shisha-e-dil ki safai pe tawajjoh dije

mausam-e-waqt bahar-haal badal jaega

bas wahi dosto is daur ka musa hoga

rah pani mein bana kar jo nikal jaega

sath jo man ki du'aen hain to insha-allah

hadisa rah mein aaega to Tal jaega

kya KHabar thi ki zara chain ke din aate hi

mere hamsae ka lahja hi badal jaega

log aa jaenge miTTi ke hawale kar ke

tere hamrah faqat tera 'amal jaega

aanch isar ke sho'lon ki dikhao 'alam'

saKHt patthar bhi jo hoga to pighal jaega