mausam hai KHush-gawar hawa mushkbar hai

mausam hai ḳhush-gavār havā mushkbār hai

lekin tire baġhair hameñ kab qarār hai

maiñ bhī ḳhizāñ-rasīda huā chāhtā huuñ ab

shāḳh-e-hinā bhī muntazir-e-dast-e-yār hai

ik dūsre ke haq meñ qasīde likhe ga.e

hālāñki sab ko sab se shikāyat hazār hai

sāñseñ ukhaḌ rahī haiñ tire intizār meñ

dil hai ki zer-e-bār-e-ġham-e-rozgār hai

phir qais ko huā hai gumān-e-visāl-e-yār

phir dasht meñ ḳhilāf-e-tavaqqo' bahār hai

tanhā.iyāñ har ek takalluf se be-niyāz

mahfil rahīn-e-rang-o-gul-o-barg-o-bār hai

mausam hai KHush-gawar hawa mushkbar hai

lekin tere baghair hamein kab qarar hai

main bhi KHizan-rasida hua chahta hun ab

shaKH-e-hina bhi muntazir-e-dast-e-yar hai

ek dusre ke haq mein qaside likhe gae

haalanki sab ko sab se shikayat hazar hai

sansen ukhaD rahi hain tere intizar mein

dil hai ki zer-e-bar-e-gham-e-rozgar hai

phir qais ko hua hai guman-e-visal-e-yar

phir dasht mein KHilaf-e-tawaqqo' bahaar hai

tanhaiyan har ek takalluf se be-niyaz

mahfil rahin-e-rang-o-gul-o-barg-o-bar hai