mausam ka hath hai na hawa hai KHalaon mein

mausam kā haath hai na havā hai ḳhalāoñ meñ

phir us ne kyā tilism rakhā hai ḳhalāoñ meñ

jo TūTtī bikhartī sī rahtī hai raat din

kuchh is tarah kī ek sadā hai ḳhalāoñ meñ

jaarī hai raushnī kā safar duur duur tak

kyā khel koī khel rahā hai ḳhalāoñ meñ

manzar bhī muḳhtalif haiñ judā is ke rañg bhī

jis tarah koī ḳhvāb-e-navā hai ḳhalāoñ meñ

jaarī hai kahkashāoñ kī bārāt is tarah

melā sā jaise koī lagā hai ḳhalāoñ meñ

san.at-garī kī ramz alag hai zamīn par

kārīgarī kā raaz judā hai ḳhalāoñ meñ

raftār aur vaqt kā andāza hai kuchh aur

fitrat kī muḳhtalif hī adā hai ḳhalāoñ meñ

is kā.enāt kī koī had hī nahīñ 'zafar'

apnā hī us ne tarz rakhā hai ḳhalāoñ meñ

mausam ka hath hai na hawa hai KHalaon mein

phir us ne kya tilism rakha hai KHalaon mein

jo TuTti bikharti si rahti hai raat din

kuchh is tarah ki ek sada hai KHalaon mein

jari hai raushni ka safar dur dur tak

kya khel koi khel raha hai KHalaon mein

manzar bhi muKHtalif hain juda is ke rang bhi

jis tarah koi KHwab-e-nawa hai KHalaon mein

jari hai kahkashaon ki baraat is tarah

mela sa jaise koi laga hai KHalaon mein

sanat-gari ki ramz alag hai zamin par

karigari ka raaz juda hai KHalaon mein

raftar aur waqt ka andaza hai kuchh aur

fitrat ki muKHtalif hi ada hai KHalaon mein

is kaenat ki koi had hi nahin 'zafar'

apna hi us ne tarz rakha hai KHalaon mein