mausam ka zahr dagh bane kyun libas par

mausam kā zahr daaġh bane kyuuñ libās par

ye soch kar na baiTh sakā sabz ghaas par

muddat huī ki tā.ir-e-jāñ sard ho chukā

uḌte rahe havāoñ meñ kuchh bad-havās par

sūraj kā phuul abr ke pattoñ meñ gum rahā

shab ke shajar kā saaya rahā mujh udaas par

vo jā chukā hai moḌ se āñkheñ haTā bhī le

bekār hoñT sabt haiñ ḳhālī gilās par

kaise nasīb ho tirī bātoñ kā zā.iqa

jī aa gayā hai taaza phaloñ kī miThās par

behtar hai ḳhud hī ajnabī ban kar use mileñ

ilzām aa.e kyuuñ mire sūrat-shanās par

ehsās bhī na thā ki hai patthar mirā badan

haañ Dūbnā paḌā hai ubharne kī aas par

paanī ko rokiye ki na hoñToñ tak aa sake

bejā na 'uzr aa.e kahīñ merī pyaas par

ye kārobār dard kā phir phailtā gayā

kholī dukāñ thī zaḳhm-e-hunar kī asaas par

'shāhid' hue haiñ dard ke sho'loñ se be-ḳhabar

chingārī pheñk diije havā meñ kapās par

mausam ka zahr dagh bane kyun libas par

ye soch kar na baiTh saka sabz ghas par

muddat hui ki tair-e-jaan sard ho chuka

uDte rahe hawaon mein kuchh bad-hawas par

suraj ka phul abr ke patton mein gum raha

shab ke shajar ka saya raha mujh udas par

wo ja chuka hai moD se aankhen haTa bhi le

bekar honT sabt hain KHali gilas par

kaise nasib ho teri baaton ka zaiqa

ji aa gaya hai taza phalon ki miThas par

behtar hai KHud hi ajnabi ban kar use milen

ilzam aae kyun mere surat-shanas par

ehsas bhi na tha ki hai patthar mera badan

han Dubna paDa hai ubharne ki aas par

pani ko rokiye ki na honTon tak aa sake

beja na 'uzr aae kahin meri pyas par

ye karobar dard ka phir phailta gaya

kholi dukan thi zaKHm-e-hunar ki asas par

'shahid' hue hain dard ke sho'lon se be-KHabar

chingari phenk dije hawa mein kapas par