mausamon ki baaton tak guftugu rahi apni

mausamoñ kī bātoñ tak guftugū rahī apnī

maiñ ne kab kahī apnī tum ne kab sunī apnī

ḳhatm hī nahīñ hote silsile savāloñ ke

silsile savāloñ ke aur ḳhāmushī apnī

ek had pe qaa.em hai ghaTtī hai na baḌhtī hai

tīrgī zamāne kī aur raushnī apnī

kuchh hasīn tasvīreñ rah ga.iiñ nigāhoñ meñ

varna kyā guzar paatī shām-e-zindagī apnī

fasl-e-gul ke hañgāme aarzī to hote haiñ

yuuñ nahīñ guzar jaate jaise zindagī apnī

kuchh udaas logoñ ne merā haal pūchhā thā

varna kaun kartā hai arz vāqa.ī apnī

is ḳhatā ne mujh ko bhī sharmsār kar Daalā

shahr ke ra.īsoñ se dostī na thī apnī

kuchh ḳhushī ke aañsū bhī ashk-e-ġham ke saath aa.e

apne jaise logoñ se jab ġhazal sunī apnī

mausamon ki baaton tak guftugu rahi apni

main ne kab kahi apni tum ne kab suni apni

KHatm hi nahin hote silsile sawalon ke

silsile sawalon ke aur KHamushi apni

ek had pe qaem hai ghaTti hai na baDhti hai

tirgi zamane ki aur raushni apni

kuchh hasin taswiren rah gain nigahon mein

warna kya guzar pati sham-e-zindagi apni

fasl-e-gul ke hangame aarzi to hote hain

yun nahin guzar jate jaise zindagi apni

kuchh udas logon ne mera haal puchha tha

warna kaun karta hai arz waqai apni

is KHata ne mujh ko bhi sharmsar kar Dala

shahr ke raison se dosti na thi apni

kuchh KHushi ke aansu bhi ashk-e-gham ke sath aae

apne jaise logon se jab ghazal suni apni