jine ki KHwahishon mein kai bar mar gae

jiine kī ḳhvāhishoñ meñ ka.ī baar mar ga.e

yuuñ apnī dāstān ke kirdār mar ga.e

kāñTe nikālne meñ hī guzrī hai zindagī

dil meñ liye hī hasrat-e-gulzār mar ga.e

ai zindagī ye terā karishma nahīñ to kyā

ham maut se hī pahle ka.ī baar mar ga.e

mausam ḳhizāñ hī kā thā magar haal ye na thā

kaisī bahār aa.ī ki ashjār mar ga.e

jis kī talāsh kījiye mil jaa.e kyā zarūr

jiine kī justujū meñ ka.ī yaar mar ga.e

sikke ke saath saath jo pagḌī uchhal paḌī

jitne bache the hāmil-e-dastār mar ga.e

'tālib' riyāz-e-fan na ruke varna dekh le

terī tarah se kitne hī fankār mar ga.e

jine ki KHwahishon mein kai bar mar gae

yun apni dastan ke kirdar mar gae

kanTe nikalne mein hi guzri hai zindagi

dil mein liye hi hasrat-e-gulzar mar gae

ai zindagi ye tera karishma nahin to kya

hum maut se hi pahle kai bar mar gae

mausam KHizan hi ka tha magar haal ye na tha

kaisi bahaar aai ki ashjar mar gae

jis ki talash kijiye mil jae kya zarur

jine ki justuju mein kai yar mar gae

sikke ke sath sath jo pagDi uchhal paDi

jitne bache the hamil-e-dastar mar gae

'talib' riyaz-e-fan na ruke warna dekh le

teri tarah se kitne hi fankar mar gae