maut thi zindagi thi yaad nahin

maut thī zindagī thī yaad nahīñ

kaun mujh se milī thī yaad nahīñ

ham ne raushan to kī thī sham-e-vafā

vo jalī thī bujhī thī yaad nahīñ

ḳhaak to ho gayā thā parvāna

sham.a kyoñ ro paḌī thī yaad nahīñ

ashk shabnam pe muskurāte haiñ

aap the yā kalī thī yaad nahīñ

koī mil ke gale to rotā thā

aap the yā ḳhushī thī yaad nahīñ

bazm-e-ishrat meñ ġham-zada dil thā

jaane kis kī kamī thī yaad nahīñ

ḳhum ke ḳhum pī gayā thā nazroñ se

phir bhī kyoñ tishnagī thī yaad nahīñ

lab pe āh-o-fuġhāñ hai 'rūmānī'

dil-lagī thī lagī thī yaad nahīñ

maut thi zindagi thi yaad nahin

kaun mujh se mili thi yaad nahin

hum ne raushan to ki thi sham-e-wafa

wo jali thi bujhi thi yaad nahin

KHak to ho gaya tha parwana

shama kyon ro paDi thi yaad nahin

ashk shabnam pe muskuraate hain

aap the ya kali thi yaad nahin

koi mil ke gale to rota tha

aap the ya KHushi thi yaad nahin

bazm-e-ishrat mein gham-zada dil tha

jaane kis ki kami thi yaad nahin

KHum ke KHum pi gaya tha nazron se

phir bhi kyon tishnagi thi yaad nahin

lab pe aah-o-fughan hai 'rumani'

dil-lagi thi lagi thi yaad nahin