mayassar agar dar tumhaara na hota

mayassar agar dar tumhārā na hotā

to sajda adā phir hamārā na hotā

mirā qalb-e-muztar na taskīn paatā

jo jalva tirā āshkārā na hotā

chaman meñ ye rangīniyāñ bhī na hotīñ

agar ḳhuun shāmil hamārā na hotā

yaqīnan vafā kī mirī qadr karte

jafā-jū agar dil tumhārā na hotā

bigaḌ jaatā hamdam mizāj-e-zamāna

jo zulfoñ ko tum ne sañvārā na hotā

bachāte jo ḳhud ko nigāh-e-butāñ se

mohabbat meñ dil paarā paarā na hotā

nihāñ ātish-e-ġham jo hotī na dil meñ

to aañsū nikal kar sharārā na hotā

bharam TuuT jaatā vafāoñ kā merī

agar zabt kā dil ko yaarā na hotā

nigāh-e-karam kaam aatī na mere

to mahshar meñ koī hamārā na hotā

kabhī bhī na mansūr kahte anal-haq

jo shāmil tumhārā ishāra na hotā

ulajhnā 'shafī.a' dām-e-zulf-e-butāñ meñ

ḳhudā ko hamāre gavārā na hotā

mayassar agar dar tumhaara na hota

to sajda ada phir hamara na hota

mera qalb-e-muztar na taskin pata

jo jalwa tera aashkara na hota

chaman mein ye ranginiyan bhi na hotin

agar KHun shamil hamara na hota

yaqinan wafa ki meri qadr karte

jafa-ju agar dil tumhaara na hota

bigaD jata hamdam mizaj-e-zamana

jo zulfon ko tum ne sanwara na hota

bachate jo KHud ko nigah-e-butan se

mohabbat mein dil para para na hota

nihan aatish-e-gham jo hoti na dil mein

to aansu nikal kar sharara na hota

bharam TuT jata wafaon ka meri

agar zabt ka dil ko yara na hota

nigah-e-karam kaam aati na mere

to mahshar mein koi hamara na hota

kabhi bhi na mansur kahte anal-haq

jo shamil tumhaara ishaara na hota

ulajhna 'shafia' dam-e-zulf-e-butan mein

KHuda ko hamare gawara na hota