mayassar ishq mein sabr-o-qarar-e-dil nahin hota

mayassar ishq meñ sabr-o-qarār-e-dil nahīñ hotā

jahāñ tūfān hotā hai vahāñ sāhil nahīñ hotā

agar koshish na kī jaa.e to kuchh hāsil nahīñ hotā

ki be-sa.ī-e-amal ta.amīr mustaqbil nahīñ hotā

nahīñ hotā jise ehsās auroñ kī musībat kā

vo ik patthar to ho saktā hai lekin dil nahīñ hotā

hadeñ mere junūn-e-shauq kī haiñ kis qadar aage

sar-e-manzil pahuñch kar bhī sar-e-manzil nahīñ hotā

tumhārī jalva-ārā.ī se rangīnī hai duniyā meñ

na hote tum to ye hangāma-e-mahfil nahīñ hotā

irāda ho to koī baat nā-mumkin nahīñ rahtī

bharosā ho to koī kaam bhī mushkil nahīñ hotā

nazar us kī ma.āl-e-zindagī jis ko nazar aa.e

samajh us kī hai jo anjām se ġhāfil nahīñ hotā

sadāqat kā zamāne meñ hamesha bol-bālā hai

jo haq par hoñ unheñ andesha-e-bātil nahīñ hotā

na khul jaa.e kahīñ rāz-e-mohabbat dekh ai 'shankar'

hujūm-e-yās meñ kuchh e'tibār-e-dil nahīñ hotā

mayassar ishq mein sabr-o-qarar-e-dil nahin hota

jahan tufan hota hai wahan sahil nahin hota

agar koshish na ki jae to kuchh hasil nahin hota

ki be-sai-e-amal tamir mustaqbil nahin hota

nahin hota jise ehsas auron ki musibat ka

wo ek patthar to ho sakta hai lekin dil nahin hota

haden mere junun-e-shauq ki hain kis qadar aage

sar-e-manzil pahunch kar bhi sar-e-manzil nahin hota

tumhaari jalwa-arai se rangini hai duniya mein

na hote tum to ye hangama-e-mahfil nahin hota

irada ho to koi baat na-mumkin nahin rahti

bharosa ho to koi kaam bhi mushkil nahin hota

nazar us ki maal-e-zindagi jis ko nazar aae

samajh us ki hai jo anjam se ghafil nahin hota

sadaqat ka zamane mein hamesha bol-baala hai

jo haq par hon unhen andesha-e-baatil nahin hota

na khul jae kahin raaz-e-mohabbat dekh ai 'shankar'

hujum-e-yas mein kuchh e'tibar-e-dil nahin hota