mayassar jin ki nazron ko tere gesu ke sae hain

mayassar jin kī nazroñ ko tire gesū ke saa.e haiñ

ġhazal ke ḳhushnumā uslūb un ke haath aa.e haiñ

yagāne aur begāne ta.assub ne banā.e haiñ

vagarna sumbul o gul ek hī gulshan ke jaa.e haiñ

haqīqat nāgavār-e-ḳhātir-e-nāzuk na ban paa.ī

kuchh is taknīk se ham ne unheñ qisse sunā.e haiñ

to vo andāz jaise merā ghar paḌtā ho raste meñ

pa.e-iz.hār-e-hamdardī vo jab tashrīf laa.e haiñ

naqāb-e-ruḳh ulaT kar us ne chashm-e-shauq ke parde

samajh meñ kuchh nahīñ aatā uThā.e haiñ girā.e haiñ

damaktā hai jabīn-e-nāz par rañg-e-pashemānī

ab un se kyā kahā jaa.e ki ye sadme uThā.e haiñ

lagāvaT kī nigāhoñ ne charāġh-e-ārzū-e-mandī

jalā.e haiñ bujhā.e haiñ bujhā.e haiñ jalā.e haiñ

jinheñ mīnā-e-mai hāsil hai jin ko durd-e-paimāna

vo jaise aap ke apne haiñ ye jaise parā.e haiñ

taġhāful kī koī had bhī to honī chāhiye āḳhir

bil-āḳhir bin bulā.e ham tirī mahfil meñ aa.e haiñ

nazar aate haiñ taare is tarah sāvan kī rātoñ meñ

kisī ne phuul kāġhaz ke samundar meñ bahā.e haiñ

yaqīñ hai 'shād' mujh ko kulliyāt-e-nazm-e-fitrat se

guloñ ne rañg-o-nik.hat ke bahut mazmūñ churā.e haiñ

mayassar jin ki nazron ko tere gesu ke sae hain

ghazal ke KHushnuma uslub un ke hath aae hain

yagane aur begane tassub ne banae hain

wagarna sumbul o gul ek hi gulshan ke jae hain

haqiqat nagawar-e-KHatir-e-nazuk na ban pai

kuchh is taknik se hum ne unhen qisse sunae hain

to wo andaz jaise mera ghar paDta ho raste mein

pae-izhaar-e-hamdardi wo jab tashrif lae hain

naqab-e-ruKH ulaT kar us ne chashm-e-shauq ke parde

samajh mein kuchh nahin aata uThae hain girae hain

damakta hai jabin-e-naz par rang-e-pashemani

ab un se kya kaha jae ki ye sadme uThae hain

lagawaT ki nigahon ne charagh-e-arzu-e-mandi

jalae hain bujhae hain bujhae hain jalae hain

jinhen mina-e-mai hasil hai jin ko durd-e-paimana

wo jaise aap ke apne hain ye jaise parae hain

taghaful ki koi had bhi to honi chahiye aaKHir

bil-aKHir bin bulae hum teri mahfil mein aae hain

nazar aate hain tare is tarah sawan ki raaton mein

kisi ne phul kaghaz ke samundar mein bahae hain

yaqin hai 'shad' mujh ko kulliyat-e-nazm-e-fitrat se

gulon ne rang-o-nikhat ke bahut mazmun churae hain