maza alam mein nahin lutf soz-e-jaan mein nahin

maza alam meñ nahīñ lutf soz-e-jāñ meñ nahīñ

sabab ye hai ki tapish parda-e-fuġhāñ meñ nahīñ

shubah agar tumheñ aadam kī dāstāñ meñ nahīñ

to phir gunāh koī sajda-e-butāñ meñ nahīñ

sab uTh chuke haiñ mohabbat meñ jis qadar the hijāb

maiñ ab vahāñ huuñ jahāñ koī darmiyāñ meñ nahīñ

ḳhizāñ ke rang meñ Duubī huī bahār haiñ ham

hamārā naam magar daftar-e-ḳhizāñ meñ nahīñ

chaman ko ham ne banāyā chaman magar ai dost

hamārī yaad bhī ab zehn-e-bāġhbāñ meñ nahīñ

hamīñ ne ḳhūn-e-tamannā se is meñ rang bharā

hamārā naam kahīñ saarī dāstāñ meñ nahīñ

tire karam kī ġhalat-baḳhshiyāñ are tauba

mire nasīb ke tinke bhī āshiyāñ meñ nahīñ

paḌe hue haiñ chaman meñ be-rang-e-begāna

vo mehmān haiñ jo zehn-e-mezbāñ meñ nahīñ

tire firāq meñ jo ashk-e-ḳhūñ bahātī thī

lahū kī buuñd bhī us chashm-e-ḳhūñ-fishāñ meñ nahīñ

guloñ ko bhī to hamīñ gul banāne vaale haiñ

magar hanūz ye ehsās bāġhbāñ meñ nahīñ

hanūz dil meñ taḌaptī hai ārzū-e-sujūd

magar kashish hī kisī sang-e-āstāñ meñ nahīñ

tire nisār mirā haal pūchhne vaale

tire karam se koī farq dard-e-jāñ meñ nahīñ

kuchh un ke sāmne yuuñ hoñT sil ga.e 'anvar'

ki tāb-e-nutq hī goyā mirī zabāñ meñ nahīñ

maza alam mein nahin lutf soz-e-jaan mein nahin

sabab ye hai ki tapish parda-e-fughan mein nahin

shubah agar tumhein aadam ki dastan mein nahin

to phir gunah koi sajda-e-butan mein nahin

sab uTh chuke hain mohabbat mein jis qadar the hijab

main ab wahan hun jahan koi darmiyan mein nahin

KHizan ke rang mein Dubi hui bahaar hain hum

hamara nam magar daftar-e-KHizan mein nahin

chaman ko hum ne banaya chaman magar ai dost

hamari yaad bhi ab zehn-e-baghban mein nahin

hamin ne KHun-e-tamanna se is mein rang bhara

hamara nam kahin sari dastan mein nahin

tere karam ki ghalat-baKHshiyan are tauba

mere nasib ke tinke bhi aashiyan mein nahin

paDe hue hain chaman mein be-rang-e-begana

wo mehman hain jo zehn-e-mezban mein nahin

tere firaq mein jo ashk-e-KHun bahati thi

lahu ki bund bhi us chashm-e-KHun-fishan mein nahin

gulon ko bhi to hamin gul banane wale hain

magar hanuz ye ehsas baghban mein nahin

hanuz dil mein taDapti hai aarzu-e-sujud

magar kashish hi kisi sang-e-astan mein nahin

tere nisar mera haal puchhne wale

tere karam se koi farq dard-e-jaan mein nahin

kuchh un ke samne yun honT sil gae 'anwar'

ki tab-e-nutq hi goya meri zaban mein nahin