maza shabab ka jab hai ki ba-KHuda bhi rahe

maza shabāb kā jab hai ki bā-ḳhudā bhī rahe

butoñ ke saath rahe aur pārsā bhī rahe

mazāq-e-husn-parastī qubūl hai mujh ko

agar nigāh haqīqat se āshnā bhī rahe

nizām-e-dahr judā kar rahā hai donoñ ko

maiñ chāhtā huuñ kalī bhī rahe sabā bhī rahe

kahāñ se jaan bache jab vo shoḳh-e-sehr-nigāh

jafā-shi.ār bhī ho mā.il-e-vafā bhī rahe

mujhe milā hai vo rañgīn-adā muqaddar se

jo dil meñ jalva-numā bhī rahe chhupā bhī rahe

chaman-parast vahī hai jis kā zauq-e-salīm

guloñ ke saa.e meñ kāñToñ se kheltā bhī rahe

vo riñd-e-pāk-tabī.at hai aap kā 'shā.ir'

sharāb bhī na piye aur jhūmtā bhī rahe

maza shabab ka jab hai ki ba-KHuda bhi rahe

buton ke sath rahe aur parsa bhi rahe

mazaq-e-husn-parasti qubul hai mujh ko

agar nigah haqiqat se aashna bhi rahe

nizam-e-dahr juda kar raha hai donon ko

main chahta hun kali bhi rahe saba bhi rahe

kahan se jaan bache jab wo shoKH-e-sehr-nigah

jafa-shiar bhi ho mail-e-wafa bhi rahe

mujhe mila hai wo rangin-ada muqaddar se

jo dil mein jalwa-numa bhi rahe chhupa bhi rahe

chaman-parast wahi hai jis ka zauq-e-salim

gulon ke sae mein kanTon se khelta bhi rahe

wo rind-e-pak-tabiat hai aap ka 'shair'

sharab bhi na piye aur jhumta bhi rahe