maza to jab hai gham-e-ishq aashkar na ho

maza to jab hai ġham-e-ishq āshkār na ho

jigar pe choT lage aur be-qarār na ho

ye dil pasand na kar dekh dāġh-dār na ho

ise na toḌ mohabbat kī yādgār na ho

zarā sañbhal ke mire hāl-e-dil ko suniyegā

mirī zabāñ kahīñ shamshīr-e-āb-dār na ho

hue haiñ merī taraf se vo bad-gumāñ aise

maiñ dil bhī chiir ke rakh duuñ to e.atibār na ho

ḳhafā na ho to batā duuñ vo raaz kī bāteñ

kuchh aur yaad dilā duuñ jo nāgavār na ho

huā huuñ gum to zamāna talāsh kartā hai

rahūñ sharīk to merā koī shumār na ho

paḌā huā hai tire dar pe is liye 'ejāz'

kahīñ talāsh kī zahmat na ho pukār na ho

maza to jab hai gham-e-ishq aashkar na ho

jigar pe choT lage aur be-qarar na ho

ye dil pasand na kar dekh dagh-dar na ho

ise na toD mohabbat ki yaadgar na ho

zara sanbhal ke mere haal-e-dil ko suniyega

meri zaban kahin shamshir-e-ab-dar na ho

hue hain meri taraf se wo bad-guman aise

main dil bhi chir ke rakh dun to eatibar na ho

KHafa na ho to bata dun wo raaz ki baaten

kuchh aur yaad dila dun jo nagawar na ho

hua hun gum to zamana talash karta hai

rahun sharik to mera koi shumar na ho

paDa hua hai tere dar pe is liye 'ejaz'

kahin talash ki zahmat na ho pukar na ho