mehman ko ghar mein aae zamana guzar gaya

mehmāñ ko ghar meñ aa.e zamāna guzar gayā

dil kā diyā bujhā.e zamāna guzar gayā

āñkhoñ meñ ashk aa.e haiñ sun kar hañsī kā naam

lekin hañsī ko aa.e zamāna guzar gayā

ai zindagī utaar bhī is baar dosh ko

mayyat mirī uThā.e zamāna guzar gayā

kyā jaane kyā chhupā.e thā dāman kī oT meñ

mujh se nazar bachā.e zamāna guzar gayā

kahtā rahā huuñ dil se ki aa.egī phir bahār

is aarzū meñ haa.e zamāna guzar gayā

ab bhī fareb detī hai āñkhoñ kī raushnī

sūrat tirī bhulā.e zamāna guzar gayā

'sīmāb' maiñ huuñ aur musalsal ġham-e-hayāt

ḳhushiyoñ ko muñh dikhā.e zamāna guzar gayā

mehman ko ghar mein aae zamana guzar gaya

dil ka diya bujhae zamana guzar gaya

aankhon mein ashk aae hain sun kar hansi ka nam

lekin hansi ko aae zamana guzar gaya

ai zindagi utar bhi is bar dosh ko

mayyat meri uThae zamana guzar gaya

kya jaane kya chhupae tha daman ki oT mein

mujh se nazar bachae zamana guzar gaya

kahta raha hun dil se ki aaegi phir bahaar

is aarzu mein hae zamana guzar gaya

ab bhi fareb deti hai aankhon ki raushni

surat teri bhulae zamana guzar gaya

'simab' main hun aur musalsal gham-e-hayat

KHushiyon ko munh dikhae zamana guzar gaya