mehr jab tak halqa-e-afaq mein aaya na tha

mehr jab tak halqa-e-āfāq meñ aayā na thā

tīrgī hī mo'atabar hogī kabhī sochā na thā

zindagī ke shahr meñ muda-dilī taqdīr thī

jo bhī jān-e-bazm thā us kā koī chehra na thā

pyaas ko aane lagā thā hukmarānī kā hunar

abr kā TukḌā kisī ko yaad bhī aatā na thā

is se pahle aisī shiddat to añdhere meñ na thī

raushnī kā harf hoñToñ se judā hotā na thā

din the lekin inqalāb aane se pahle ke the din

phuul abhī mahkā na thā patthar abhī bolā na thā

dukh ke sūraj ko savā neze pe 'bedī' dekh kar

ḳhvāb sukh ke dekhtā thā aadmī andhā na thā

mehr jab tak halqa-e-afaq mein aaya na tha

tirgi hi mo'atabar hogi kabhi socha na tha

zindagi ke shahr mein muda-dili taqdir thi

jo bhi jaan-e-bazm tha us ka koi chehra na tha

pyas ko aane laga tha hukmarani ka hunar

abr ka TukDa kisi ko yaad bhi aata na tha

is se pahle aisi shiddat to andhere mein na thi

raushni ka harf honTon se juda hota na tha

din the lekin inqalab aane se pahle ke the din

phul abhi mahka na tha patthar abhi bola na tha

dukh ke suraj ko sawa neze pe 'bedi' dekh kar

KHwab sukh ke dekhta tha aadmi andha na tha