mehr-o-mah-o-anjum ka kuchh nishan nahin milta

mehr-o-māh-o-anjum kā kuchh nishāñ nahīñ miltā

uḌ rahā huuñ barsoñ se āsmāñ nahīñ miltā

raushnī kā imkāñ bhī ab yahāñ nahīñ miltā

ikkā-dukkā jugnū bhī zau-fishāñ nahīñ miltā

tan pe saaya karne ko sā.ebāñ to miltā hai

ruuh ke sulāne ko āshiyāñ nahīñ miltā

dil kī raushnī le kar dilbar-e-azal ko maiñ

DhūñDhtā huuñ muddat se aur nishāñ nahīñ miltā

mere dil kī dhaḌkan hī garche us kā maskan hai

DhūñDhtā huuñ jab dil meñ kuchh nishāñ nahīñ miltā

aarzū meñ phūloñ kī phir rahā huuñ sahrā meñ

ret ke musāfir ko gulsitāñ nahīñ miltā

chūr-chūr rahtā hai har dam aa.ina dil kā

bevafā zamāne meñ mehrbāñ nahīñ miltā

miltā-jultā rahtā hai nā-murād duniyā se

apne jāñ-nisāroñ se bad-gumāñ nahīñ miltā

us kā milnā-julnā hai ġhāyat-o-ġharaz le kar

banda-e-ġharaz hai vo rā.egāñ nahīñ miltā

bastiyoñ ke dāman meñ Dher haiñ makānoñ ke

muztarib tamannā ko lā-makāñ nahīñ miltā

bastiyoñ ke parbat haiñ qāfile haiñ logoñ ke

aadmī koī in meñ jān-e-jāñ nahīñ miltā

aadmī kī kasrat se aadmī pareshāñ hai

aadmī kā is par bhī kuchh nishāñ nahīñ miltā

jis ke paas yakjā hoñ dīn-o-dānish-o-daulat

aise mard-e-kāmil kā āstāñ nahīñ miltā

dafn ho ga.e kitne aish kī tamannā meñ

aish agar milā bhī to jāvedāñ nahīñ miltā

sach hai dasht-e-imkāñ hai ek dhuñdlā naqsh-e-pā

naqsh jis se rahrav kā kuchh nishāñ nahīñ miltā

ilm-o-fan ke parvāno ye bhī kyā qayāmat hai

'rāz' ko yahāñ koī rāz-dāñ nahīñ miltā

mehr-o-mah-o-anjum ka kuchh nishan nahin milta

uD raha hun barson se aasman nahin milta

raushni ka imkan bhi ab yahan nahin milta

ikka-dukka jugnu bhi zau-fishan nahin milta

tan pe saya karne ko saeban to milta hai

ruh ke sulane ko aashiyan nahin milta

dil ki raushni le kar dilbar-e-azal ko main

DhunDhta hun muddat se aur nishan nahin milta

mere dil ki dhaDkan hi garche us ka maskan hai

DhunDhta hun jab dil mein kuchh nishan nahin milta

aarzu mein phulon ki phir raha hun sahra mein

ret ke musafir ko gulsitan nahin milta

chur-chur rahta hai har dam aaina dil ka

bewafa zamane mein mehrban nahin milta

milta-julta rahta hai na-murad duniya se

apne jaan-nisaron se bad-guman nahin milta

us ka milna-julna hai ghayat-o-gharaz le kar

banda-e-gharaz hai wo raegan nahin milta

bastiyon ke daman mein Dher hain makanon ke

muztarib tamanna ko la-makan nahin milta

bastiyon ke parbat hain qafile hain logon ke

aadmi koi in mein jaan-e-jaan nahin milta

aadmi ki kasrat se aadmi pareshan hai

aadmi ka is par bhi kuchh nishan nahin milta

jis ke pas yakja hon din-o-danish-o-daulat

aise mard-e-kaamil ka aastan nahin milta

dafn ho gae kitne aish ki tamanna mein

aish agar mila bhi to jawedan nahin milta

sach hai dasht-e-imkan hai ek dhundla naqsh-e-pa

naqsh jis se rahraw ka kuchh nishan nahin milta

ilm-o-fan ke parwano ye bhi kya qayamat hai

'raaz' ko yahan koi raaz-dan nahin milta