mere dil mein to har zaman ho tum

mere dil meñ to har zamāñ ho tum

chashm-e-zāhir se kyuuñ nihāñ ho tum

be-vafā.eñ kā aib kaisā hai

ye to sach hai ki merī jaañ ho tum

jab chalo TīTar hī kī chalte ho

mere haq meñ to āsmāñ ho tum

dil-o-dīñ donoñ nazr kartā huuñ

aisī chīzoñ ke qadr-dāñ ho tum

dekh ġhamgīñ mujhe bigaḌte ho

par-le darje ke bad-gumāñ ho tum

arsh-paimā.ī-e-ḳhayāl abas

kaun pahuñchā vahāñ jahāñ ho tum

baat meñ dil ko khīñch lete ho

kis qayāmat ke ḳhush-bayāñ ho tum

hai savāl aur aur javāb hai aur

sach kaho is ghaḌī kahāñ ho tum

bachiye aġhyār kī nazar na lage

chashm-e-bad-dūr naujavāñ ho tum

dushmanī ham kareñ to kis kis se

ek aalam pe mehrbāñ ho tum

zulf ke baar se kamar lachke

kis qadar nāzuk ai miyāñ ho tum

dekhne kī majāl hai kis ko

misl-e-ḳhurshīd go ayaañ ho tum

hai vahī Thiik jo kaho 'majrūh'

kyuuñ na ho sāhab-e-zabāñ ho tum

mere dil mein to har zaman ho tum

chashm-e-zahir se kyun nihan ho tum

be-wafaen ka aib kaisa hai

ye to sach hai ki meri jaan ho tum

jab chalo TiTar hi ki chalte ho

mere haq mein to aasman ho tum

dil-o-din donon nazr karta hun

aisi chizon ke qadr-dan ho tum

dekh ghamgin mujhe bigaDte ho

par-le darje ke bad-guman ho tum

arsh-paimai-e-KHayal abas

kaun pahuncha wahan jahan ho tum

baat mein dil ko khinch lete ho

kis qayamat ke KHush-bayan ho tum

hai sawal aur aur jawab hai aur

sach kaho is ghaDi kahan ho tum

bachiye aghyar ki nazar na lage

chashm-e-bad-dur naujawan ho tum

dushmani hum karen to kis kis se

ek aalam pe mehrban ho tum

zulf ke bar se kamar lachke

kis qadar nazuk ai miyan ho tum

dekhne ki majal hai kis ko

misl-e-KHurshid go ayan ho tum

hai wahi Thik jo kaho 'majruh'

kyun na ho sahab-e-zaban ho tum