mere ehsas-e-junun ka tarjuman hona hi tha

mere ehsās-e-junūñ kā tarjumāñ honā hī thā

ek din to hāl-e-dil un par ayaañ honā hī thā

shiddat-e-ehsās apnī dekh kar itnā na Dar

ye vo jazba hai jise ik din javāñ honā hī thā

apnī manzil ke liye jo rāsta maiñ ne chunā

us pe raushan tere qadmoñ kā nishāñ honā hī thā

naqsh ho kar rah ga.ī vo muskurāhaT zehn par

ye vo lamha thā jo āḳhir jāvedāñ honā hī thā

hai pas-e-nazm-e-anāsir koī poshīda zarūr

baaġh hai duniyā agar to bāġhbāñ honā hī thā

dekh kar vo husn ham itnā hī kah paa.e ki vaah

aur is ke baad dil ko be-zabāñ honā hī thā

thā kahāñ itnā aham vo diid kā lamha mirā

lekin us ko bhī to zeb-e-dāstāñ honā hī thā

nā-munāsib hī sahī merā bahak jaanā magar

dekh kar us ko nasha kuchh to miyāñ honā hī thā

mujh se gar rūThe hue rahte bhī to vo kab talak

ek din to un ko mujh pe mehrbāñ honā hī thā

mere ehsas-e-junun ka tarjuman hona hi tha

ek din to haal-e-dil un par ayan hona hi tha

shiddat-e-ehsas apni dekh kar itna na Dar

ye wo jazba hai jise ek din jawan hona hi tha

apni manzil ke liye jo rasta main ne chuna

us pe raushan tere qadmon ka nishan hona hi tha

naqsh ho kar rah gai wo muskurahaT zehn par

ye wo lamha tha jo aaKHir jawedan hona hi tha

hai pas-e-nazm-e-anasir koi poshida zarur

bagh hai duniya agar to baghban hona hi tha

dekh kar wo husn hum itna hi kah pae ki wah

aur is ke baad dil ko be-zaban hona hi tha

tha kahan itna aham wo did ka lamha mera

lekin us ko bhi to zeb-e-dastan hona hi tha

na-munasib hi sahi mera bahak jaana magar

dekh kar us ko nasha kuchh to miyan hona hi tha

mujh se gar ruThe hue rahte bhi to wo kab talak

ek din to un ko mujh pe mehrban hona hi tha