mere ehsas ki rag rag mein samane wale

mere ehsās kī rag rag meñ samāne vaale

ab kahāñ haiñ mujhe din-rāt satāne vaale

dekh lete haiñ magar aañkh churā jaate haiñ

dost har vaqt mujhe paas biThāne vaale

band paanī kī tarah bekas-o-majbūr haiñ ab

tund maujoñ kī tarah shor machāne vaale

ek patthar bhī sar-e-rāhguzar rakkhā hai

raat gahrī hai zarā dhyān se jaane vaale

kaun bujhte hue sūraj kī taraf dekhegā

haiñ ujāloñ ke talabgār zamāne vaale

haar ke baiTh ga.e dhuup kī āġhosh meñ ḳhud

sard rātoñ meñ mirā jism jalāne vaale

gir ga.e ret kī dīvār ho jaise 'shāhid'

ban ke kohsār mirī raah meñ aane vaale

mere ehsas ki rag rag mein samane wale

ab kahan hain mujhe din-raat satane wale

dekh lete hain magar aankh chura jate hain

dost har waqt mujhe pas biThane wale

band pani ki tarah bekas-o-majbur hain ab

tund maujon ki tarah shor machane wale

ek patthar bhi sar-e-rahguzar rakkha hai

raat gahri hai zara dhyan se jaane wale

kaun bujhte hue suraj ki taraf dekhega

hain ujalon ke talabgar zamane wale

haar ke baiTh gae dhup ki aaghosh mein KHud

sard raaton mein mera jism jalane wale

gir gae ret ki diwar ho jaise 'shahid'

ban ke kohsar meri rah mein aane wale