mere ehsas ko aaina dikhata kyon hai

mere ehsās ko ā.īna dikhātā kyoñ hai

tū samundar hai to qatre ko Darātā kyoñ hai

mujh ko āvāz de gar terā ḳhatā-kār huuñ maiñ

apne maqtal meñ ishāroñ se bulātā kyoñ hai

tū haqīqat hai to apne ko numāyāñ kar de

tū agar ḳhvāb hai phir ḳhvāb dikhātā kyoñ hai

terā īmān hī jab tark-e-ta'alluq Thahrā

ek bujhtī huī qindīl jalātā kyoñ hai

terī taqdīr meñ tūfān bhī haiñ aañsū bhī

phir bhalā ret kī dīvār uThātā kyoñ hai

mausam-e-gul kā fasāna to sunāne de unheñ

ḳhushk pattoñ ko daraḳhtoñ se girātā kyoñ hai

maiñ tirā raaz bhī dam-sāz bhī ġhammāz bhī huuñ

apnī mahfil se mujhe aaj uThātā kyoñ hai

tū 'ajab ḳhvāb hai jis kī koī tā'bīr nahīñ

merī tanhā.ī kī rag rag meñ samātā kyoñ hai

tū ne ik dar pe na jaane kī qasam khaa.ī thī

lekin ik ghar kā pata sab ko batātā kyoñ hai

miT gayā jab tirā ehsās-e-jamāl ai 'sūfī'

zehn meñ phir na.ī tasvīr banātā kyoñ hai

mere ehsas ko aaina dikhata kyon hai

tu samundar hai to qatre ko Daraata kyon hai

mujh ko aawaz de gar tera KHata-kar hun main

apne maqtal mein ishaaron se bulata kyon hai

tu haqiqat hai to apne ko numayan kar de

tu agar KHwab hai phir KHwab dikhata kyon hai

tera iman hi jab tark-e-ta'alluq Thahra

ek bujhti hui qindil jalata kyon hai

teri taqdir mein tufan bhi hain aansu bhi

phir bhala ret ki diwar uThata kyon hai

mausam-e-gul ka fasana to sunane de unhen

KHushk patton ko daraKHton se giraata kyon hai

main tera raaz bhi dam-saz bhi ghammaz bhi hun

apni mahfil se mujhe aaj uThata kyon hai

tu 'ajab KHwab hai jis ki koi ta'bir nahin

meri tanhai ki rag rag mein samata kyon hai

tu ne ek dar pe na jaane ki qasam khai thi

lekin ek ghar ka pata sab ko batata kyon hai

miT gaya jab tera ehsas-e-jamal ai 'sufi'

zehn mein phir nai taswir banata kyon hai