mere gham ki haqiqat ka zamana raazdan kyon ho

mere ġham kī haqīqat kā zamāna rāzdāñ kyoñ ho

nihāñ hai raaz jo dil meñ vo ashkoñ se ayaañ kyoñ ho

sukūn-e-mustaqil kyoñ ho nishāt-e-jāvedāñ kyoñ ho

jo dil meñ dard hai vo bā.is-e-taskīn-e-jāñ kyoñ ho

chaman meñ jis taraf dekho nasheman hī nasheman haiñ

Thikānā barq kā merī hī shāḳh-e-āshiyāñ kyoñ ho

zamīñ un kī zamāñ un kā makāñ-o-lā-makāñ un kā

to ai nāseh jabīñ-sā.ī ko qaid-e-āstāñ kyoñ ho

chaman kī pāsbānī meñ lahū ham ne bahāyā hai

hamāre sāmne darham nizām-e-gulsitāñ kyoñ ho

parastār-e-tajallī huuñ vafādār-e-mohabbat huuñ

maiñ us se kyoñ karūñ shikva vo mujh par mehrbāñ kyoñ ho

rah-e-hastī ke pech-o-ḳham se ham ai 'dard' vāqif haiñ

bhaTak jaa.e jo manzil se hamārā kārvāñ kyoñ ho

mere gham ki haqiqat ka zamana raazdan kyon ho

nihan hai raaz jo dil mein wo ashkon se ayan kyon ho

sukun-e-mustaqil kyon ho nishat-e-jawedan kyon ho

jo dil mein dard hai wo bais-e-taskin-e-jaan kyon ho

chaman mein jis taraf dekho nasheman hi nasheman hain

Thikana barq ka meri hi shaKH-e-ashiyan kyon ho

zamin un ki zaman un ka makan-o-la-makan un ka

to ai naseh jabin-sai ko qaid-e-astan kyon ho

chaman ki pasbani mein lahu hum ne bahaya hai

hamare samne darham nizam-e-gulsitan kyon ho

parastar-e-tajalli hun wafadar-e-mohabbat hun

main us se kyon karun shikwa wo mujh par mehrban kyon ho

rah-e-hasti ke pech-o-KHam se hum ai 'dard' waqif hain

bhaTak jae jo manzil se hamara karwan kyon ho