mere gham ko jo apna batate rahe

mere ġham ko jo apnā batāte rahe

vaqt paḌne pe hāthoñ se jaate rahe

bārisheñ aa.iiñ aur faisla kar ga.iiñ

log TuuTī chhateñ āzmāte rahe

āñkheñ manzar huiiñ kaan naġhma hue

ghar ke andāz hī ghar se jaate rahe

shaam aa.ī to bichhḌe hue ham-safar

āñsuoñ se in āñkhoñ meñ aate rahe

nanhe bachchoñ ne chhū bhī liyā chāñd ko

būḌhe baabā kahānī sunāte rahe

duur tak haath meñ koī patthar na thā

phir bhī ham jaane kyuuñ sar bachāte rahe

shā.irī zahr thī kyā kareñ ai 'vasīm'

log piite rahe ham pilāte rahe

mere gham ko jo apna batate rahe

waqt paDne pe hathon se jate rahe

barishen aain aur faisla kar gain

log TuTi chhaten aazmate rahe

aankhen manzar huin kan naghma hue

ghar ke andaz hi ghar se jate rahe

sham aai to bichhDe hue ham-safar

aansuon se in aankhon mein aate rahe

nanhe bachchon ne chhu bhi liya chand ko

buDhe baba kahani sunate rahe

dur tak hath mein koi patthar na tha

phir bhi hum jaane kyun sar bachate rahe

shairi zahr thi kya karen ai 'wasim'

log pite rahe hum pilate rahe