mere jaanib se use ja ja ke samjhate hain log

mere jānib se use jā jā ke samjhāte haiñ log

vo nahīñ sunñe kā zid be-kār dilvāte haiñ log

shola-ḳhū merā sune mujh dil-jale kā haal kyuuñ

aag meñ aag aur bhī nāhaq lagā aate haiñ log

mere marne par unheñ kyuuñ rashk se pūchho koī

kyuuñ sar-e-bālīñ mire be-kār chillāte haiñ log

koī kahtā hai tujhe jallād koī sañg-dil

terī jānib se mujhe aa aa ke dhamkāte haiñ log

maiñ na jiitā huuñ na martā huuñ sisaktā huuñ paḌā

jhuuT sach qasmeñ tumhāre sāmne khāte haiñ log

dostī ke parde meñ karte haiñ mujh se dushmanī

tum ko phir aglī jafā.eñ yaad dilvāte haiñ log

terī mahfil meñ mirā aanā jo un ko baar hai

chheḌ kar tujh ko mujhe bāteñ hī sunvāte haiñ log

tum se aur va.ada vafā ho ye hameñ bāvar nahīñ

qasmeñ de kar tum ko nāhaq jhuuT bulvāte haiñ log

baaz aayā āsmāñ in kī havā-ḳhvāhī se maiñ

aag dil kī aur bhī aa aa ke bhaḌkāte haiñ log

mere jaanib se use ja ja ke samjhate hain log

wo nahin sunne ka zid be-kar dilwate hain log

shola-KHu mera sune mujh dil-jale ka haal kyun

aag mein aag aur bhi nahaq laga aate hain log

mere marne par unhen kyun rashk se puchho koi

kyun sar-e-baalin mere be-kar chillate hain log

koi kahta hai tujhe jallad koi sang-dil

teri jaanib se mujhe aa aa ke dhamkate hain log

main na jita hun na marta hun sisakta hun paDa

jhuT sach qasmen tumhaare samne khate hain log

dosti ke parde mein karte hain mujh se dushmani

tum ko phir agli jafaen yaad dilwate hain log

teri mahfil mein mera aana jo un ko bar hai

chheD kar tujh ko mujhe baaten hi sunwate hain log

tum se aur wada wafa ho ye hamein bawar nahin

qasmen de kar tum ko nahaq jhuT bulwate hain log

baz aaya aasman in ki hawa-KHwahi se main

aag dil ki aur bhi aa aa ke bhaDkate hain log