mere jaise is basti mein aur bhi pagal rahte hain

mere jaise is bastī meñ aur bhī pāgal rahte haiñ

sab ne āñkheñ girvī rakh kar aadhe ḳhvāb ḳharīde haiñ

koyal kavvā chiil kabūtar totā mainā chiḌiyā mor

shaam Dhale sab chup chup baiThe ik duuje ko takte haiñ

dariyā sāgar ambar bādal bārish āñdhī dhuup havā

sab terā bahrūp hai sā.īñ terā naam hī japte haiñ

ḳhālī kursī do cup chaa.e sabza ḳhushbū būñdā-bāndī

sub.h-savere mujh se mil kar terī bāteñ karte haiñ

hijr udāsī vahshat aañsū āvāra-pan be-zārī

shorīda dil chaak garebāñ sab ulfat ke jhagḌe haiñ

'sāġhar' 'mīr' 'farāz' aur 'ġhālib' 'momin' 'dāġh' 'qatīl' aur 'faiz'

oḌh ke misre nazmeñ ġhazleñ chain sukūn se sote haiñ

bāteñ yādeñ rāteñ āñkheñ bāñheñ aaheñ fariyādeñ

suune ghar ke ik kone meñ aksar mil kar rote haiñ

chāñd sitāre jugnū sūraj pariyāñ jin uḌte panchhī

sab dhartī par aakar 'dānish' us ke paañv ko chhūte haiñ

mere jaise is basti mein aur bhi pagal rahte hain

sab ne aankhen girwi rakh kar aadhe KHwab KHaride hain

koyal kawwa chil kabutar tota maina chiDiya mor

sham Dhale sab chup chup baiThe ek duje ko takte hain

dariya sagar ambar baadal barish aandhi dhup hawa

sab tera bahrup hai sain tera nam hi japte hain

KHali kursi do cup chae sabza KHushbu bunda-bandi

subh-sawere mujh se mil kar teri baaten karte hain

hijr udasi wahshat aansu aawara-pan be-zari

shorida dil chaak gareban sab ulfat ke jhagDe hain

'saghar' 'mir' 'faraaz' aur 'ghaalib' 'momin' 'dagh' 'qatil' aur 'faiz'

oDh ke misre nazmen ghazlen chain sukun se sote hain

baaten yaaden raaten aankhen banhen aahen fariyaaden

sune ghar ke ek kone mein aksar mil kar rote hain

chand sitare jugnu suraj pariyan jin uDte panchhi

sab dharti par aakar 'danish' us ke panw ko chhute hain