mere junun-e-shauq ka aalam hi aur tha

mere junūn-e-shauq kā aalam hī aur thā

vo ibtidā-e-ishq kā mausam hī aur thā

jis ne mire shu.ūr ko baḳhshā thā e.atibār

vo ġham ġham-e-hayāt na thā ġham hī aur thā

vo lan-tarāniyāñ na vo lāf-o-gazāf thā

vo aa gayā to bazm kā aalam hī aur thā

tahzīb-e-nau ne mom ko patthar banā diyā

ik din vo thā fasāna-e-ādam hī aur thā

lazzat-shanās zer-e-ġham-e-ishq thā ye dil

lekin jo ab ke baar milā sam hī aur thā

sharh-o-bayāñ se aur ulajhtā chalā gayā

ai ham-nashīñ vo qissa-e-mub.ham hī aur thā

pahle bhī arz-e-hāl ye royā hai vo magar

kal raat us kā girya-e-paiham hī aur thā

ḳhanjar kī dhaar jis ne rag-e-jāñ se kaaT dī

vo e.atibār-e-azmat-e-ādam hī aur thā

'jābir' harīf-e-gardish-e-daurāñ thā un dinoñ

vo thā sharīk-e-hāl to dam-ḳham hī aur thā

mere junun-e-shauq ka aalam hi aur tha

wo ibtida-e-ishq ka mausam hi aur tha

jis ne mere shuur ko baKHsha tha eatibar

wo gham gham-e-hayat na tha gham hi aur tha

wo lan-taraniyan na wo laf-o-gazaf tha

wo aa gaya to bazm ka aalam hi aur tha

tahzib-e-nau ne mom ko patthar bana diya

ek din wo tha fasana-e-adam hi aur tha

lazzat-shanas zer-e-gham-e-ishq tha ye dil

lekin jo ab ke bar mila sam hi aur tha

sharh-o-bayan se aur ulajhta chala gaya

ai ham-nashin wo qissa-e-mubham hi aur tha

pahle bhi arz-e-haal ye roya hai wo magar

kal raat us ka girya-e-paiham hi aur tha

KHanjar ki dhaar jis ne rag-e-jaan se kaT di

wo eatibar-e-azmat-e-adam hi aur tha

'jabir' harif-e-gardish-e-dauran tha un dinon

wo tha sharik-e-haal to dam-KHam hi aur tha