mere liye to phir koi mera nahin hua

mere liye to phir koī merā nahīñ huā

tujh se bichhaḌ ke maiñ bhī kisī kā nahīñ huā

us ne bhī ḳhvāhishoñ ko bahakne nahīñ diyā

maiñ bhī junūn-e-ishq meñ andhā nahīñ huā

boyā thā ham ne jo bhī vahī kāTnā paḌā

kaise kaheñ ki jo huā achchhā nahīñ huā

vaqt-e-duā ye ḳhauf satātā rahā mujhe

maqbūl kyā mirā koī sajda nahīñ huā

shab-bhar tumhārī yaad kā pahra lagā rahā

phir aaj ham pe niiñd kā hamla nahīñ huā

dushvāriyoñ meñ ham ko ḳhudā yaad aa gayā

varna to ek vaqt kā sajda nahīñ huā

'mashkūr' kī sadā pe vo muḌ kar na aa sakā

nārāz ham se vo kabhī itnā nahīñ huā

mere liye to phir koi mera nahin hua

tujh se bichhaD ke main bhi kisi ka nahin hua

us ne bhi KHwahishon ko bahakne nahin diya

main bhi junun-e-ishq mein andha nahin hua

boya tha hum ne jo bhi wahi kaTna paDa

kaise kahen ki jo hua achchha nahin hua

waqt-e-dua ye KHauf satata raha mujhe

maqbul kya mera koi sajda nahin hua

shab-bhar tumhaari yaad ka pahra laga raha

phir aaj hum pe nind ka hamla nahin hua

dushwariyon mein hum ko KHuda yaad aa gaya

warna to ek waqt ka sajda nahin hua

'mashkur' ki sada pe wo muD kar na aa saka

naraaz hum se wo kabhi itna nahin hua