mere nale par nahin tujhko taghaful ke siwa

mere naale par nahīñ tujh ko taġhāful ke sivā

gul nahīñ suntā kisī kā shor-e-bulbul ke sivā

tum jo kuchh chāho karo jaur-o-itāb-o-ḳhashm-o-nāz

kuchh nahīñ bantā hai āshiq se tahammul ke sivā

jo suḳhan-ras āshnā haiñ zulf-o-kākul ke tirī

un ko mazmūñ bhī nahīñ miltā hai sumbul ke sivā

kis tarah mujh se judā.ī tujh ko aatī hai pasand

qāfiya gul kā nahīñ Thahre hai bulbul ke sivā

vāste muusā ke surma tuur kā hai ai 'razā'

maiñ na duuñ āñkhoñ meñ ḳhāk-e-pā-e-duldul ke sivā

mere nale par nahin tujh ko taghaful ke siwa

gul nahin sunta kisi ka shor-e-bulbul ke siwa

tum jo kuchh chaho karo jaur-o-itab-o-KHashm-o-naz

kuchh nahin banta hai aashiq se tahammul ke siwa

jo suKHan-ras aashna hain zulf-o-kakul ke teri

un ko mazmun bhi nahin milta hai sumbul ke siwa

kis tarah mujh se judai tujh ko aati hai pasand

qafiya gul ka nahin Thahre hai bulbul ke siwa

waste musa ke surma tur ka hai ai 'raza'

main na dun aankhon mein KHak-e-pa-e-duldul ke siwa