meri aankhon ko nae KHwab dikhane wale

merī āñkhoñ ko na.e ḳhvāb dikhāne vaale

dil meñ bhī aao nigāhoñ meñ samāne vaale

haiñ bahut hī yahāñ chalte ko girāne vaale

aadmī kam haiñ yahāñ saath nibhāne vaale

dil meñ hai kyā ye kabhī khul ke bayāñ bhī kar do

dekh kar mujh ko nigāhoñ ko jhukāne vaale

jāntā huuñ maiñ haqīqat jo tire dil meñ hai

pyaar meñ ghol mujhe zahr pilāne vaale

māñgtī haiñ ye du'ā rab se vafā.eñ merī

tū bhī taḌpe mirī chāhat ko bhulāne vaale

kyā tujhe apnī jafāoñ kī ḳhabar hai kuchh bhī

mujh pe ilzām jafāoñ kā lagāne vaale

aa tire dil meñ mohabbat kā ujālā bhar duuñ

dekh chehre ko mire 'iid manāne vaale

yaad ā.eñgī tujhe jab bhī vafā.eñ merī

tū bhī ro.egā mire dil ko rulāne vaale

ab to rasman hī yahāñ log milā karte haiñ

dil milāte hī nahīñ haath milāne vaale

thak gayā huuñ maiñ yahāñ bojh ġhamoñ kā Dhote

zindagī merī badal duniyā banāne vaale

zindagī sukh kī tasallī maiñ tujhe kaise duuñ

luuT kar le ga.e jab chain zamāne vaale

ḳhvāb mahloñ ke nahīñ ham haiñ sajāte 'hīrā'

ham to insān haiñ bas khāne-kamāne vaale

meri aankhon ko nae KHwab dikhane wale

dil mein bhi aao nigahon mein samane wale

hain bahut hi yahan chalte ko girane wale

aadmi kam hain yahan sath nibhane wale

dil mein hai kya ye kabhi khul ke bayan bhi kar do

dekh kar mujh ko nigahon ko jhukane wale

jaanta hun main haqiqat jo tere dil mein hai

pyar mein ghol mujhe zahr pilane wale

mangti hain ye du'a rab se wafaen meri

tu bhi taDpe meri chahat ko bhulane wale

kya tujhe apni jafaon ki KHabar hai kuchh bhi

mujh pe ilzam jafaon ka lagane wale

aa tere dil mein mohabbat ka ujala bhar dun

dekh chehre ko mere 'id manane wale

yaad aaengi tujhe jab bhi wafaen meri

tu bhi roega mere dil ko rulane wale

ab to rasman hi yahan log mila karte hain

dil milate hi nahin hath milane wale

thak gaya hun main yahan bojh ghamon ka Dhote

zindagi meri badal duniya banane wale

zindagi sukh ki tasalli main tujhe kaise dun

luT kar le gae jab chain zamane wale

KHwab mahlon ke nahin hum hain sajate 'hira'

hum to insan hain bas khane-kamane wale