meri ghazlon ka har qafiya mustarad

merī ġhazloñ kā har qāfiya mustarad

aap hoñ sāmne aa.ina mustarad

jaan bach jaa.e to hādisa mustarad

sar paTaḳhtī havā kā nasha mustarad

shā.erī-vā.erī dekhtā kaun hai

husn jab tak na ho shā.era mustarad

tū mire saath ho aur duniyā bhī ho

is musallas kā ik zāviya mustarad

zindagī laakh qadmoñ meñ paḌtī rahī

kar diyā us kā har faisla mustarad

tujh pe merā yaqīñ is qadar be-aTal

zehn-o-dil kā har ik vasvasa mustarad

ham tire ġham kī talḳhī se haiñ āshnā

ab nayā koī bhī zā.iqa mustarad

rabb-e-akbar kā har faisla dil-kushā

jā nujūmī tirā zā.icha mustarad

meri ghazlon ka har qafiya mustarad

aap hon samne aaina mustarad

jaan bach jae to hadisa mustarad

sar paTaKHti hawa ka nasha mustarad

shaeri-waeri dekhta kaun hai

husn jab tak na ho shaera mustarad

tu mere sath ho aur duniya bhi ho

is musallas ka ek zawiya mustarad

zindagi lakh qadmon mein paDti rahi

kar diya us ka har faisla mustarad

tujh pe mera yaqin is qadar be-aTal

zehn-o-dil ka har ek waswasa mustarad

hum tere gham ki talKHi se hain aashna

ab naya koi bhi zaiqa mustarad

rabb-e-akbar ka har faisla dil-kusha

ja nujumi tera zaicha mustarad