meri hi taswir mein honTon par tala KHamoshi ka

merī hī tasvīr meñ hoñToñ par taalā ḳhāmoshī kā

haa.e musavvir ne khīñchā hai kyā naqsha ḳhāmoshī kā

ham donoñ kā ahd huā thā ek zabān hī boleñge

tum bolo kyā matlab samjhūñ yak-tarfa ḳhāmoshī kā

ik chup sau sukh vaalī mantiq aaj samajh meñ aa.ī hai

ab logoñ meñ aam karūñgā ye nusḳha ḳhāmoshī kā

maiñ ne apne vaqt ko sāhib do hissoñ meñ bāñTā hai

aadhā mere shor kā hai baaqī aadhā ḳhāmoshī kā

ik darvesh se le aaya huuñ de kar shor kā kaaTh kabāḌ

hijr kī lakḌī chup kī handī aur chūlhā ḳhāmoshī kā

jannat se jo saath meñ utrī vo bhī ik ḳhāmoshī thī

so aadam se jā miltā hai yuuñ shajara ḳhāmoshī kā

ab to mere hoñToñ ko bhī lafzoñ kī pahchān nahīñ

us tak jaane kab pahuñchegā ye charchā ḳhāmoshī kā

merī aaj zabāñ-bandī meñ tere log hī shāmil haiñ

mujh par aise Daal na saarā tū malba ḳhāmoshī kā

us kī merī bātoñ meñ bas do hī pahlū hote the

kuchh hotā thā shor-sharāba kuchh hissa ḳhāmoshī kā

kab tak mujh se duur rakhegā harf-o-saut kā har āhang

kab tak mere saath rahegā ye sadma ḳhāmoshī kā

terā kyā nuqsān huā hai tū jī bhar ke shor machā

mere paas to ek bachā hai vo rasta ḳhāmoshī kā

maiñ ne ḳhvāb meñ ḳhāmoshī ko shor machāte dekhā hai

'dānish' ab to denā hogā kuchh sadqa ḳhāmoshī kā

meri hi taswir mein honTon par tala KHamoshi ka

hae musawwir ne khincha hai kya naqsha KHamoshi ka

hum donon ka ahd hua tha ek zaban hi bolenge

tum bolo kya matlab samjhun yak-tarfa KHamoshi ka

ek chup sau sukh wali mantiq aaj samajh mein aai hai

ab logon mein aam karunga ye nusKHa KHamoshi ka

main ne apne waqt ko sahib do hisson mein banTa hai

aadha mere shor ka hai baqi aadha KHamoshi ka

ek darwesh se le aaya hun de kar shor ka kaTh kabaD

hijr ki lakDi chup ki handi aur chulha KHamoshi ka

jannat se jo sath mein utri wo bhi ek KHamoshi thi

so aadam se ja milta hai yun shajara KHamoshi ka

ab to mere honTon ko bhi lafzon ki pahchan nahin

us tak jaane kab pahunchega ye charcha KHamoshi ka

meri aaj zaban-bandi mein tere log hi shamil hain

mujh par aise Dal na sara tu malba KHamoshi ka

us ki meri baaton mein bas do hi pahlu hote the

kuchh hota tha shor-sharaba kuchh hissa KHamoshi ka

kab tak mujh se dur rakhega harf-o-saut ka har aahang

kab tak mere sath rahega ye sadma KHamoshi ka

tera kya nuqsan hua hai tu ji bhar ke shor macha

mere pas to ek bacha hai wo rasta KHamoshi ka

main ne KHwab mein KHamoshi ko shor machate dekha hai

'danish' ab to dena hoga kuchh sadqa KHamoshi ka