meri kashti ko kinare pe lagate bhi nahin

merī kashtī ko kināre pe lagāte bhī nahīñ

apnā kahte hai magar rishta nibhāte bhī nahīñ

ik zamāne se mujhe un se shikāyat hai yahī

yaad karte bhī nahīñ mujh ko bhulāte bhī nahīñ

zaḳhm phir tum ne kiye taaza vagarna ham to

dard tā-umr tumheñ apnā batāte bhī nahīñ

jānte haiñ ki tumheñ farq na paḌnā koī

apnī palkoñ pe so ham ashk sajāte bhī nahīñ

kuchh na badlā hai na ummīd badalne kī kuchh

jānte haiñ tabhī to shor machāte bhī nahīñ

is zamāne kī yahī ek haqīqat hai 'jyotī'

log rasman hī sahī dil se nibhāte bhī nahīñ

meri kashti ko kinare pe lagate bhi nahin

apna kahte hai magar rishta nibhate bhi nahin

ek zamane se mujhe un se shikayat hai yahi

yaad karte bhi nahin mujh ko bhulate bhi nahin

zaKHm phir tum ne kiye taza wagarna hum to

dard ta-umr tumhein apna batate bhi nahin

jaante hain ki tumhein farq na paDna koi

apni palkon pe so hum ashk sajate bhi nahin

kuchh na badla hai na ummid badalne ki kuchh

jaante hain tabhi to shor machate bhi nahin

is zamane ki yahi ek haqiqat hai 'jyoti'

log rasman hi sahi dil se nibhate bhi nahin