meri mushkil ko jo aasan nahin hone deta

merī mushkil ko jo āsāñ nahīñ hone detā

vo mire dard kā darmāñ nahīñ hone detā

tū ne ummīd lagā.ī bhī to kis kāfir se

jo kabhī sāhab-e-īmāñ nahīñ hone detā

maiñ ne to umr luTā dī hai magar vo apnā

ek lamhe kā bhī nuqsāñ nahīñ hone detā

nit na.e dard to ījād kiye rakhtā hai

aur ḳhud ko vo pashemāñ nahīñ hone detā

yās-o-hirmāñ ke fasāne to sunātā hai magar

ranj se chaak garebāñ nahīñ hone detā

aas vo ḳhvāb dilātā hai rifāqat kī magar

'kaif' aisā koī imkāñ nahīñ hone detā

meri mushkil ko jo aasan nahin hone deta

wo mere dard ka darman nahin hone deta

tu ne ummid lagai bhi to kis kafir se

jo kabhi sahab-e-iman nahin hone deta

main ne to umr luTa di hai magar wo apna

ek lamhe ka bhi nuqsan nahin hone deta

nit nae dard to ijad kiye rakhta hai

aur KHud ko wo pasheman nahin hone deta

yas-o-hirman ke fasane to sunata hai magar

ranj se chaak gareban nahin hone deta

aas wo KHwab dilata hai rifaqat ki magar

'kaif' aisa koi imkan nahin hone deta